12.01.2025 | 00:54
Կիևյան փողոցի տներից մեկում հրդեհ է բռնկվել. դեպքի վայր է մեկնել չորս մարտական հաշվարկ
Նավալնին հայտնել է իր մարմնի վրա «Նովիչոկ»-ի հետքերի մասին
Քաղաքականություն
21.09.2020 | 15:37
Ռուսաստանցի ընդդիմադիր գործիչ Ալեքսեյ Նավալնին ՌԴ իրավապահ մարմիններից պահանջել է վերադարձնել իր հագուստը, որն առգրավվել է՝ օդանավում ինքնազգացողությունը վատանալուց հետո։ Այս մասին գրում է ՌԲԿ-ն՝ հավելելով, որ Գերմանիայում, որտեղ Նավալնին բուժում է անցնում, կարծում են, թե նա թունավորվել է «Նովիչոկ» խմբի թույնով, իսկ ռուսական իշխանությունները քրեական գործ հարուցելու հիմք չեն տեսնում։
«Հիմա ինձ մի բան է հետաքրքրում՝ իմ հագուստը։ «Նախաքննական ստուգումների» 30 օրն օգտագործվել է՝ այդ կարևորագույն ապացույցը թաքցնելու համար։ Գերմանիա մեկնելու թույլտվություն տալուց առաջ իմ ամբողջ հագուստը հանել են և ինձ բացարձակ մերկ են ուղարկել»,- իր բլոգում գրել է Նավալնին։
Նա հագուստը կարևոր ապացուցողական իր է անվանել, քանի որ թույնը Գերմանիայում հայտնաբերել են իր մարմնի վրա, այդ պատճառով, ըստ գործչի, մեծ է հավանականությունը, որ իրեն փորձել են թունավորել շփման եղանակով՝ «Նովիչոկը» քսելով հենց հագուստին։
«Նախաքննական ստուգումների համար օրենքով նախատեսված 30 օրն անցել է։ Ես պահանջում եմ, որպեսզի իմ հագուստը խնամքով փաթեթավորեն և վերադարձնեն»,- հավելել է Նավալնին։
Միաժամանակ, Ալեքսեյ Նավալնին քիչ առաջ գրառում է կատարել Facebook-ի իր էջում։ «Հրապարակում սիրո մասին» վերնագրած գրառմանը նա նաև լուսանկար է հրապարակել կնոջ՝ Յուլիայի հետ, որից պարզ է դառնում, որ գործիչը նկատելիորեն կազդուրվել է։
