20.05.2026 | 15:24
Մենք օր օրի ավելի ենք մոտենում վիզաների ազատականացմանը. Արփինե Սարգսյան․ ՏԵՍԱՆՅՈՒԹ
«Բոլորովին վերջերս ես չէի ճանաչում մարդկանց և չէի հասկանում ինչպես խոսել». Նավալնին՝ իր վերականգնման մասին
Հասարակություն
19.09.2020 | 18:19
Ռուս ընդդիմադիր գործիչ Ալեքսեյ Նավալնին Instagram-ի իր էջում գրառում է կատարել՝ պատմելով, թե ինչպես է ընթանում իր վերականգնումը:
«Եկեք պատմեմ, թե ինչպես է ընթանում իմ վերականգնումը: Սա արդեն հստակ ճանապարհ է, թեև ոչ մոտ։ Բոլոր ընթացիկ խնդիրները, ինչպես օրինակ այն, որ հեռախոսն իմ ձեռքում քարի պես անօգուտ է, իսկ վրաս ջուր թափելը վերածվում է մի ամբողջ ատրակցիոնի, անմիտ բաներ են:
Բացատրեմ: Բոլորովին վերջերս ես չէի ճանաչում մարդկանց և չէի հասկանում ինչպես խոսել: Ամեն առավոտ բժիշկը գալիս էր ինձ մոտ ու ասում․ «Ալեքսեյ, գրատախտակ եմ բերել, եկեք միասին մտածենք՝ ինչ բառ կարելի է գրել»։ Դա ինձ հուսահատության էր հասցնում, քանի որ չնայած հասկանում էի՝ ինչ է բժիշկն ուզում, բայց չէի հասկանում, թե որտեղից պետք է վերցնել բառերը, գլխի որ հատվածում են դրանք առաջանում։ Ես նաև չգիտեի, թե ինչպես արտահայտեմ իմ հուսահատությունը, ուստի պարզապես լռում էի:
Իսկ հիմա մի տղա եմ, որի ոտքերը դողում են աստիճանների վրա, բայց միևնույն ժամանակ մտածում է․ «Օ՜, սա աստիճան է։ Դրանով բարձրանում են։ Թերևս, հարկավոր է վերելակ գտնել»։ Իսկ առաջ հիմարի պես կկանգնեի ու կնայեի։
Բեռլինի «Շարիտե» կլինիկայի բժիշկները լուծել են գլխավոր խնդիրը. նրանք ինձ «տեխնիկապես ողջ մարդուց» վերածել են մարդու, որն ունի ժամանակակից հասարակության բարձրագույն էակ դառնալու բոլոր հնարավորությունները, մարդու, որը կարողանում է արագ թերթել Instagram-ը և առանց մտածելու հասկանում է՝ որտեղ դնել լայքերը», – գրել է Նավալնին:
Հիշեցնենք, որ Նավալնիի ինքնազգացողությունը կտրուկ վատացել էր օգոստոսի 20-ին Տոմսկից Մոսկվա թռչելիս: Նրան տեղափոխող ինքնաթիռն արտակարգ վայրէջք էր կատարել Օմսկ քաղաքում, ուր նրան հոսպիտալացրել են շտապօգնության թիվ մեկ հիվանդանոց:
Օգոստոսի 22-ին Նավալնիին ինքնաթիռով տեղափոխել են Բեռլինի Charite հիվանդանոց, որի մասնագետներն ավելի ուշ հայտարարել էին վերջինիս թունավորման մասին, իսկ Գերմանիայի զինված ուժերի մասնագետները մաշկի, արյան և մեզի նմուշների մեջ «Նովիչոկ» խմբին պատկանող թունավոր նյութի հետքեր էին հայտնաբերել:
