18.11.2024 | 13:17
Էրդողանը ռուս-ուկրաինական պատերազմը սառեցնելու ծրագիր է պատրաստել․ Bloomberg
Կորոնավիրուսի համաճարակի հետ կապված իրավիճակը վերահսկողությունից դուրս է․ ՄԱԿ-ի գլխավոր քարտուղար
Քաղաքականություն
17.09.2020 | 19:46
ՄԱԿ-ի գլխավոր քարտուղար Անտոնիո Գուտերեշը հայտարարել է, որ կորոնավիրուսի համաճարակի հետ կապված իրավիճակը վերահսկողությունից դուրս է։
«Բռնկումը շարունակում է վերահսկողությունից դուրս մնալ։ Շուտով արդեն վիրուսի զոհերի թիվը կգերազանցի մեկ միլիոնը։ COVID-19-ի շարունակվող համաճարակը նախկինի պես գլոբալ խնդիրների երկար ցանկում առաջին տեղում է»,- սեպտեմբերի 16-ի երեկոյան հրավիրված ասուլիսում ասել է Գուտերեշը, գրում է DW-ի ռուսական ծառայությունը։
Նշելով, որ շատերը հույսեր են կապում պատվաստանյութի հետ, Գուտերեշն արձանագրել է, որ «համաճարակի դեմ դարման չկա»։
«Միայն պատվաստանյութը չի կարող կարգավորել այս ճգնաժամը և, առավել ևս, մոտ ժամանակներում։ Մենք պետք է ընդլայնենք նոր և արդեն գոյություն ունեցող գործիքների կիրառումը, որոնք կարող են օգնել՝ արձագանքել նոր դեպքերին և կենսական կարևորությամբ բուժում ապահովել՝ հիվանդության փոխանցումը դադարեցնելու և կյանքեր փրկելու համար, հատկապես՝ առաջիկա 12 ամիսներին»,- ասել է ՄԱԿ-ի գլխավոր քարտուղարը։
Անդրադառնալով կորոնավիրուսի դեմ պատվաստանյութերի մասին տարատեսակ լուրերին՝ Անտոնիո Գուտերեշը մտահոգություն է հայտնել դավադրությունների տեսությունների մասին տարածվող տեղեկությունների առնչությամբ։
«Մարդիկ պետք է պատրաստ լինեն պատվաստմանը, սակայն պատվաստանյութերի մասին ապատեղեկատվության տարածումը մտահոգություններ և դավադրությունների տեսություններ է ծնում»,- ասել է նա՝ նշելով, որ տարբեր երկրներում մեծ թվով մարդիկ կտրականապես դեմ են արտահայտվում պատվաստանյութերին։
«Այս մահացու հիվանդությոն դեմ մենք պետք է անենք հնարավոր ամեն ինչ, որպեսզի կանխենք մահաբեր ապատեղեկատվության տարածումը»,- կոչ է արել Գուտերեշը։
