06.11.2026 | 01:59
Եվրոպա լիգա. «Արարատ-Արմենիան» ցավալի պարտություն կրեց Պորտուգալիայում. ՏԵՍԱՆՅՈՒԹ
Գերմանացի բժիշկները Նավալնիի թունավորման հարցով հրաժարվել են ՌԴ-ի հետ համատեղ փորձաքննությունից
Քաղաքականություն
08.09.2020 | 14:14
Գերմանիայի Դաշնային բժշկական պալատը (BÄK) մերժել է Ալեքսեյ Նավալնիի գործով բժշկական փորձաքննություն անցկացնելու համար համատեղ խումբ ստեղծելու մասին ռուսաստանցի գործընկերների առաջարկը։ Այս մասին գրում է DW-ի ռուսական ծառայությունը՝ վկայակոչելով Deutsches Ärzteblatt պարբերականը։
ՌԴ Ազգային բժշկական պալատի նախագահ Լեոնիդ Ռոշալի դիմումին ի պատասխան՝ BÄK-ում նշել են, որ ասոցիացիան «քննչական մարմին չէ», այդ պատճառով չի կարող մասնակցել հետաքննությունների, դա պետության իրավասությունն է։ Բացի այդ, BÄK-ում ընդգծել են, որ գերմանական օրենսդրության համաձայն՝ միայն հարազատներն իրավունք ունեն հետագա հետազոտության նախաձեռնությամբ հանդես գալ։
«Նավալնիի գործով բժշկական տվյալները հասանելի են։ Ոչ մի կասկած չկա բժշկական հետազոտության որակի հարցում, որոնք անցկացվել են Գերմանիայի բժիշկների կողմից»,- նշել են Դաշնային բժշկական պալատում։
BÄK-ում նաև «ծայրաստիճան մտահոգություն» են հայտնել Նավալնիի առողջական վիճակի հետ կապված՝ միանալով ռուսական իշխանություններին ուղղված Գերմանիայի կառավարության պահանջին՝ պարզել բոլոր հանգամանքները, որոնք հանգեցրել են կյանքի համար վտանգավոր հիվանդության։
Նշենք, որ համատեղ բժշկական փորձաքննություն անցկացնելու՝ Լեոնիդ Ռոշալի առաջարկը մերժել է նաև Նավալնու կինը՝ Յուլյա Նավալնայան։
Հիշեցնենք նաև, որ բժիշկներին երեկ հաջողվել է կոմայից դուրս բերել Ալեքսեյ Նավալնուն։ Նրա բժիշկը նշել է, որ քաղաքական գործիչն արձագանքում է բանավոր խոսքին:
