Ադրբեջանում շարունակում են հերոսացել Ռամիլ Սաֆարովին․ նա հանդիպումներ է ունեցել Մեջլիսում

Ադրբեջանում շարունակվում է մարդասպան Ռամիլ Սաֆարովի հերոսացման գործընթացը։ Սաֆարովն այսօր եղել է Ադրբեջանի Միլի Մեջլիսում՝ խորհրդարանում, ու հանդիպել Մեջլիսի մշակույթի հանձնաժողովի նախագահ Գանիրա Փաշաևային։ Այս մասին հաղորդում են  ադրբեջանական մի շարք լրատվամիջոցներ։

Փաշաևան շնորհավորել է Սաֆարովին ծննդյան օրվա կապակցությամբ՝ հաջողություններ մաղթելով անձնական ու գործնական կյանքում ու հույս հայտնել, որ հաջորդ տարի Սաֆարովն իր ծնունդը կնշի հարազատ Ջաբրաիլում։  Փաշաևան նաև նշել է, որ «գերագույն գլխավոր հրամանատարի գլխավորությամբ, Ադրբեջանի ԶՈՒ-ի ու Սաֆարովի նման հայրենասեր սպաների հետ միասին «կազատագրեն» Լեռնային Ղարաբաղը»։

Հիշեցնենք, որ 2004 թվականին Հունգարիայի մայրաքաղաք Բուդապեշտում ՆԱՏՕ-ի «Գործընկերություն հանուն խաղաղության» անգլալեզու ուսումնական դասընթացներին մասնակցող Սաֆարովը գիշերը մուտք էր գործել նույն դասընթացին մասնակցող հայ սպա Գուրգեն Մարգարյանի սենյակ և կացնի 16 հարվածով սպանել նրան։ Հունգարիայի դատարանը 2006 թվականին Ռամիլ Սաֆարովին ցմահ ազատազրկման դատապարտեց, սակայն Սաֆարովը բանտում անցկացրեց ընդամենը 6 տարի: Ադրբեջանի ու Հունգարիայի իշխանությունների պայմանավորվածության արդյունքում 2012թ. օգոստոսի 31-ին Սաֆարովն արտահանձնվեց Բաքվին։ Ադրբեջան ոտք դնելուց հետո Սաֆարովն ընդունվեց  հերոսի պես, նախագահ Իլհամ Ալիևը նրան ներում շնորհեց, մայորի զինվորական կոչման արժանացրեց ու աշխատավարձ վճարեց։ Արդեն ութ տարի է՝ Սաֆարովն ազատության մեջ է, Ադրբեջանում էլ մինչև օրս շարունակում են նրան հերոսացնել։

Նշենք նաև, որ մայիսի 26-ին Մարդու իրավունքների եվրոպական դատարանը հրապարակեց ՀՀ ԶՈՒ սպա Գուրգեն Մարգարյանի՝ «Մակուչյանն ու Մինասյանն ընդդեմ Ադրբեջանի և Հունգարիայի» գործով վճիռը, որով արձանագրել է, որ Ադրբեջանը խախտել է Մարդու իրավունքների եվրոպական կոնվենցիայի 2-րդ հոդվածը (կյանքի իրավունք) և 14-րդ հոդվածը (խտրականության արգելք)։

Եվրոպական դատարանը որոշել է, որ Ադրբեջանն անարդարացիորեն ձախողել է էթնիկ ատելության հողի վրա կատարված սպանության համար իր քաղաքացու նկատմամբ արտասահմանում սահմանված ազատազրկման պահանջի հետագա իրագործումը։ Նշվում է նաև, որ Սաֆարովն Ադրբեջանում մեծարվել է կատարած դաժան սպանության համար։

Էմմա Չոբանյան