14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Թուրքիան եղել է ու կլինի Ադրբեջանի կողքին․ Թուրքիայի պաշտպանության նախարարը շարունակում է սպառնալ Հայաստանին
Քաղաքականություն
27.08.2020 | 16:23
Թուրքիան լի է վճռականությամբ տարածաշրջանում պաշտպանելու իր շահերը։ Այս մասին Թուրքիայի պաշտպանության նախարար Հուլուսի Աքարն ասել է «Անադոլու» լրատվական գործակալության հետ զրույցում։
Թուրք նախարարի խոսքով՝ վերջին տարիներին Անկարայի դիրքերը աշխարհում զգալիորեն ամրապնդվել են։
«Թուրքիայի ազդեցության գոտին իր սահմաններից ավելի լայն է։ Թուրքական բանակը մնում է Անկարայի հակառակորդների համար արդյունավետ զսպիչ ուժ»,- ասել է Աքարը։
Անդրադառնալով տարբեր երկրներում Թուրքիայի գործողություններին՝ Աքարը կրկին Հայաստանից է խոսել ու սպառնացել՝ աջակցություն հայտնելով Ադրբեջանին։
Թուրքիայի պաշտպանության նախարարը ևս մեկ անգամ ընդգծել է, որ Անկարան պատրաստ է մեծ ներդրում ունենալ Ադրբեջանի ԶՈՒ-ի մարտունակության բարձրացման գործում։
«Ադրբեջանն ու Թուրքիան մեկ ազգ ու երկու պետություն են։ Նրանք մեզ համար եղբայրական ժողովուրդ են։ Թուրքիան եղել է ու միշտ կլինի Ադրբեջանի կողքին»,- ասել է Աքարը։
Նա նաև նշել է, որ հայկական կողմը «աբսուրդային» ու «անհիմն» հարձակումներ է իրականցնում ոչ միայն Ադրբեջանի, այլև Թուրքիայի դեմ։
«Պատմական իրադարձությունները հստակ արտացոլված են արխիվային նյութերում։ Կողմնապահությունը ոչ մի բանի չի հանգեցնի»,- ասել է նա։
Հիշեցնենք, որ օգոստոսի 12-ին Հուլուսի Աքարը թուրք բարձրաստիճան զինվորականների հետ այցելել էր Ադրբեջան ու հանդիպել նախագահ Իլհամ Ալիևին։ Ադրբեջանում նա ևս սպառնացել էր Հայաստանին՝ ասելով, որ Թուրքիան մինչև վերջ Ադրբեջանի հետ է ու կշարունակի աջակցել իր արդար պայքարում։
Ադրբեջանի ՊՆ Զաքիր Հասանովն էլ իր հերթին ասել էր, որ Ադրբեջանի ԶՈՒ-ը Թուրքիայի բանակի աջակցությամբ կկատարի իր սուրբ պարտքը։
«Ես համոզված եմ, որ Ադրբեջանի ու Թուրքիայի ԶՈւ-երը իրենց պարտքը կկատարեն, երբ ժամանակը գա»,- ասել էր Հասանովը։
Էմմա Չոբանյան
