ԵՐԵՎԱՆԻ ԺԱՄԱՆԱԿՈՎ. Հայաստանում մշակութային հեղափոխություն տեղի չի ունեցել. Ռուբեն Բաբայան. ՏԵՍԱՆՅՈՒԹ

«Հեղափոխությունը, որը տեղի ունեցավ մեզ մոտ, կիմաստավորվի միայն այն ժամանակ, եթե տեղի ունենան բարեփոխումներ: Հեղափոխությունն առանց բարեփոխումների, որոնք միշտ լինում են ցավոտ, իշխանափոխություն է: Մեր ոլորտում այդ բարեփոխումները չկան: Հայաստանում մշակութային հեղափոխություն տեղի չի ունեցել»,- Factor TV-ի հետ զրույցում նման տեսակետ է հայտնում Երևանի պետական տիկնիկային թատրոնի գեղարվեստական ղեկավար և տնօրեն Ռուբեն Բաբայանը:

Նրա համոզմամբ՝ իշխանությունը մշակույթը դիտարկում է որպես փակ համակարգ, լավագույն դեպքում՝ որպես սպասարկման ոլորտ, վատագույն դեպքում՝ միջոցառումների կազմակերպման ոլորտ:

«Իշխանությունն ինչպես նախկինում, այնպես էլ հիմա չի գիտակցում, թե որն է մշակույթի դերը: Իրականում մշակույթը քաղաքակրթական ընտրություն է»,- շեշտում է մեր զրուցակիցը:

Նրա խոսքով՝ որպեսզի տեղի ունենան բարեփոխումներ, հարկավոր է ընդունել օրենքներ, օրինակ՝ «Մեկենասության և հովանավորչության մասին» օրենքը, պետք է գտնել ուղիներ՝ բիզնեսը մշակույթի հետ կապելու, ամբողջ հանրապետությունը մշակութային կյանքում ներգրավելու համար:

«Մենք չունենք պետական մշակված հայեցակարգ: Ինչպես Հայաստանում, այնպես էլ ուզածդ երկրում, օրինակ, Ֆինանսների նախարարությունը դեմ է «Մեկենասության և հովանավորչության մասին» օրենքին, ուստի առաջին դեմքը պետք է կայացնի քաղաքական որոշում»,-նկատում է պարոն Բաբայանը:

Նրա կարծիքով՝ որպեսզի մշակույթի ոլորտը զարգանա, անհրաժեշտ է, որ մշակույթի նախարարությունը լինի առանձին կառույց: Թատրոնի տնօրենն անդրադառնում է նաև ներկայիս իշխանության գործելաոճին՝ ընդգծելով՝ որքան շատ ձայներ է ստացած լինում տվյալ իշխանությունը, և որքան լեգիտիմ է այն, այնքան մեծ են հանրության պահանջները:

«Մենք շատ ենք կենտրոնանում վարչապետի վրա, բայց բոլոր պաշտոնյաները պետք է իմանան, որ պատասխանատու են հանրության առաջ: Պետական պաշտոնների պետք է նշանակել ոչ միայն մարդկանց, որոնք տիրապետում են իրենց գործին, այլ մարդկանց, որոնք կարողանում են հասարակության հետ կապը պահել»,- ասում է պարոն Բաբայանը:

Մանրամասները՝ տեսանյութում:

Աննա Բաբաջանյան