12.01.2025 | 00:54
Կիևյան փողոցի տներից մեկում հրդեհ է բռնկվել. դեպքի վայր է մեկնել չորս մարտական հաշվարկ
Սևանա լճի ափամերձ հատվածում ընթացքի մեջ է ապօրինի տաղավարների ապամոնտաժումը
25.08.2020 | 12:17
Սևանա լճի ափամերձ հատվածում ընթացքի մեջ է ապօրինի տաղավարների ապամոնտաժումը. այս մասին հայտնում է «Սևան» ազգային պարկի ֆեյսբուքյան էջը:
Շրջակա միջավայրի նախարար Ռոմանոս Պետրոսյանի «Սևան» ազգային պարկ այցի ժամանակ տեղում վեր է հանվել ափամերձ հատվածի ապօրինի կառուցապատման դեպք. Սևանի թերակղզու կենտրոնական հատվածում, նախկին նավամատույց տանող ասֆալտապատ ճանապարհից ձախ լճափնյա մասում տարածքի հողօգտագործողն ինքնակամ տեղադրել էր երկաթյա կոնստրուկցիաներով բացօթյա տաղավար-սրճարան:
«Նախարարը կարգադրել է ստուգել համապատասխան շինարարական փաստաթղթերի առկայությունն ու իրավախախտումներին շուտափույթ լուծում տալ՝ ամենասեղմ ժամկետներում ափամերձ հատվածն ազատելով ապօրինի կառույցից։ Այս պահին ապօրինի տաղավարի ապամոնտաժումն ընթացքի մեջ է»,- նշված է հաղորդագրությունում:
«Սևան» ազգային պարկի ղեկավարությունը հիշեցնում է, որ Սևանա լճի ու դրա ջրհավաք ավազանի ջրային պաշարների, կենդանական և բուսական աշխարհի, էկոլոգիական ենթահամակարգերի անխաթարության ապահովման գործում անչափ կարևոր ու առանցքային է ափամերձ հատվածներում տնտեսավարման պատշաճ վերահսկողությունն ու ապօրինի շենք-շինությունների ապամոնտաժումը։
«Ստուգայցներն ու դիտարկումները կրում են պարբերական բնույթ, ապօրինի և օրենքի խախտմամբ կառուցված յուրաքանչյուր շենք-շինություն ու տաղավար կապամոնտաժվի օրենքով սահմանված կարգով։ Պահպանե՛նք մեր ազգային հարստությունը»,- ասված է գրառման մեջ:
