17.09.2026 | 20:33
Ալիևը հայտարարել է՝ «եթե ՄԱԿ-ը նորմալ գործեր, ստիպված չէինք լինի ուժով նվաճել մեր տարածքները»
«ՏաԹևերը» կհյուրընկալի դպրոցականներին. IDeA հիմնադրամ
Հասարակություն
25.08.2020 | 10:21
IDeA հիմնադրամից տեղեկացնում են, որ աշխարհի ամենաերկար հետադարձելի (5752 մ) ճոպանուղին՝ «ՏաԹևերը» հայտարարում է հատուկ ակցիա դպրոցականների և մանկատան սաների համար: Նրանք առանց տոմսի կօգտվեն ճոպանուղուց: Ակցիան կգործի օգոստոսի 25-ից սեպտեմբերի 15-ը ներառյալ:
«Բնության չքնաղ տեսարանները, Որոտանի կիրճն իր համայնապատկերով և ճոպանուղին՝ սավառնող դեպի Տաթևի վանական համալիր, կթողնեն անմոռանալի հուշեր և տպավորություններ:
2010 թ.-ից գործող և Գինեսի ռեկորդակիր համարվող «ՏաԹևեր» ճոպանուղին Հայաստանի կարևոր այցեքարտերից մեկն է, որը նպաստում է տեղի ենթակառուցվածքների զարգացմանը և խթանում թե՛ ներքին, թե՛ արտաքին զբոսաշրջությունը: Տասը տարվա ընթացքում ճոպանուղուց օգտվել է շուրջ մեկ միլիոն այցելու:
Չնայած նրան, որ կորոնավիրուսային համավարակի տարածման հետևանքով այս տարի ճոպանուղին ունի զբոսաշրջային հոսքի կտրուկ նվազում, որը հիմնադիրներից պահանջում է լրացուցիչ ֆինանսավորում՝ ընթացիկ գործունեության ապահովման և ծախսերը հոգալու համար, «ՏաԹևերը» շարունակում է իր թռիչքները և առաջարկում նոր հետաքրքիր փաթեթներ այցելուների և հյուրերի համար:
«ՏաԹևեր» ճոպանողու կառուցման 10-ամյակին ընդառաջ, դպրոցականներն ու մանկատան սաները հնարավորություն կունենան այցելելու նաև Հայաստանի ամենահայտնի հոգևոր, մշակութային և լուսավորչական կենտրոններից մեկը՝ 9-րդ դարի Տաթևի վանական համալիր:
«Սա դպրոցականների համար կդառնա ոչ միայն արկածներով լի ճամփորդություն և հետաքրքիր ժամանց, այլև ճանաչողական այց պատմամշակութային, հոգևոր և կրթական տեսանկյունից: Այս տարի ներքին տուրիզմի խթանման համար մենք տարբեր ակցիաներ ենք իրականացնում: Օրինակ՝ հուլիս ամսին հայտարարել էինք ակցիա, որի շրջանակում այցելուները ձեռք էին բերում ճոպանուղու 4 տոմս 3 տոմսի արժեքով: Դա հատկապես խթանեց ընտանիքների այցը դեպի Տաթև»,- ասում է «ՏաԹևեր» ճոպանուղու տնօրեն Վահե Բաղդասարյանը:
«ՏաԹևեր» ճոպանուղին կառուցվել է «Տաթևի վերածնունդ» ծրագրի շրջանակում, որի կողմից իրականացվում են նաև Տաթևի վանական համալիրի վերականգնումն ու հարակից համայնքների զարգացումը: Ճոպանուղին հանդիսանում է վենչուրային բարեգործության նախագծի օրինակ, երբ բարեգործը չի ակնկալում ներդրված գումարի վերադարձ, սակայն նախագիծը պետք է ապահովի գործունեությունից եկամուտ, որը թույլ կտա հոգալ գործունեության հետ կապված բոլոր ծախսերը: Ավելին, ճոպանուղու և հարակից զբոսաշրջային ենթակառուցվածքից ստացված եկամուտն ուղղվում է Տաթևի վանական համալիրի վերականգմանը, ինչպես նաև համայնքի զարգացման տարբեր նախաձեռնությունների»,- ասված է հաղորդագրությունում:
