26.09.2026 | 12:45
Նավթի գները նվազել են
Թուրքիան՝ թյուրքական պետությունների հետ ստեղծում է միավորված՝ Թուրանական բանակ
Քաղաքականություն
21.08.2020 | 13:56
Թուրքիան ձևավորում է թյուրքական պետությունների հետ միավորված բանակ։ Թուրանական բանակը՝ թյուրքական երկրների միավորված բանակը, կստեղծվի այս տարի հոկտեմբերի 29-ին։ Հեռուստահաղորդման եթերում նման հայտարարություն է արել թուրք ստրատեգ Քաան Սարիայդինը։ Այս մասին հաղորդում է ադրբեջանական Axar.az լրատվական կայքը։
«Թուրքիան ստեղծում է միասնական բանակ թյուրքական պետությունների հետ։ Եվ սա արդեն երազանք չէ։ Մենք շատ ենք աշխատել այս ծրագրի վրա։ Սա մի օրվա աշխատանք չէ։ Ժամանակը եկել է հայտարարելու՝ Թուրանական բանակը կստեղծվի հոկտեմբերի 29-ին։ Թյուրքական միության հայտարարությունը մոտ է»,- ասել է թուրք գործիչը։
Չի հաղորդվում, թե որ երկրներն են կազմելու Թուրանական բանակը։ Սակայն ենթադրելի է, որ դրանք «Թյուրքական խորհուրդ» միջազգային կազմակերպության անդամ երկրներն են։
Նշենք, որ թյուրքալեզու պետություններին միավորող «Թյուրքական խորհուրդը» ստեղծվել է 2009թ-ին, հիմնադիր անդամներն են Թուրքիան, Ադրբեջանը, Ղազախստանն ու Ղրղզստանը։ Կազմակերպությանը հետագայում միացել է նաև Ուզբեկստանը։
Ի դեպ, այս կառույցի երկու անդամները՝ Ղազախստանն ու Ղրղզստանը, Հայաստանի հետ ՀԱՊԿ անդամ երկրներ են։
Էմմա Չոբանյան
