11.01.2025 | 22:52
Վարչապետը առաջնահերթ է համարում խաղաղության գործընթացը, թվայնացումը և կոռուպցիայի դեմ պայքարը. ՏԵՍԱՆՅՈՒԹ
ԵՄ-ն չի ճանաչում Բելառուսում կայացած նախագահական ընտրությունների արդյունքները
Քաղաքականություն
19.08.2020 | 18:36
ԵՄ երկրների պետությունների և կառավարությունների ղեկավարները չեն ճանաչում Բելառուսում կայացած նախագահական ընտրությունների արդյունքները: Ինչպես փոխանցում է DW-ի ռուսաստանյան ծառայությունը, այս մասին այսօր հայտարարել է Գերմանիայի կանցլեր Անգելա Մերկելը Բելառուսի հարցով Բրյուսելում կայացած ԵՄ արտահերթ գագաթնաժողովի ավարտին:
«Ընտրությունները ոչ արդար էին, ոչ էլ ազատ, ուստի դրանց արդյունքները չեն կարող ճանաչվել»,- ասել է Մերկելը:
Գերմանիայի կանցլերը նաև անդրադարձել է օգոստոսի 9-ին Բելառուսում կայացած նախագահական ընտրությունների ժամանակ արձանագրված զանգվածային ընտրախախտումների դեպքերին:
«Չկա որևէ կասկած, որ տեղի են ունեցել զանգվածային ընտրախախտումներ: Մենք դատապարտում ենք մարդկանց նկատմամբ դաժան բռնությունը»,- Մերկելն ասել է մոտ երեք ժամ տևած խորհրդակցությունից հետո:
Նա հավելել է, որ բոլոր քաղբանտարկյալները պետք է անվերապահորեն ազատ արձակվեն: «Մենք կանգնած ենք խաղաղ ցուցարարների կողքին»,- ամփոփել է նա:
Եվրախորհրդի նախագահ Չարլզ Միշելն, իր հերթին, նշել է, որ չեն ճանաչելու ընտրությունների արդյունքները: «Բացի այդ, ԵՄ-ն պատժամիջոցներ կկիրառի բոլոր այն անձանց նկատմամբ, ովքեր պատասխանատու են Բելառուսում բռնությունների և ընտրակեղծիքների համար»,- ասել է նա:
Չարլզ Միշելը կոչ է արել Մինսկին խաղաղ ճանապարհ գտել ճգնաժամից դուրս գալու համար:
