Ժամկետանց գարեջուրը՝ էներգիայի աղբյուր. Ավստրալիայում բիոգազի վերածված գարեջուրը բնակարաններ է լուսավորել

Երբ մարտին ռեստորանները, սրճարաններն ու բարերը կորոնավիրուսի պատճառով սկեցին փակվել, Ավստրալիայում գարեջրագործները չվաճառված գարեջրի հսկայական պաշարներ ունեին , հայտնում է CNN-ը:

Ժամկետանց գարեջուրը թավելու փոխարեն՝ Հարավային Ավստրալիայում այն սկսեցին օգտագործել այլ ոլորտում՝ վերականգնվող էներգիա ստանալու նպատակով:

Վերջին ամիսներին  Գլենելգի կեղտաջրերի մաքրման գործարանում միլիոնավոր լիտրերով չօգտագործված գարեջուր վեր է ածվել վերականգնվող էներգիայի՝ ջրի մաքրման գործընթացը ապահովելու համար:

Այստեղ արդյունաբերական օրգանական թափոնները խառնում են կոյուղու տիղմի հետ կենսագազ ստանալու համար, որը հետագայում վեր է ածվում էլեկտրաէներգիայի: Արդյունքում, ստացվում է բավարար չափով կենսագազ, որն էլ ապահովում է ամբողջ տարածքի էներգիայի մոտ 80%:

«Վերջերս գարեջրի շնորհիվ էներգիայի արտադրությունը բարձրացել է նոր մակարդակի՝ մեկ ամսում հասնելով 654 ՄՎտժ-ի»,-ասել է Հարավային Ավստրալիայի կառավարությանը պատկանող SA Water կազմակերպության ներկայացուցիչ Լիզա Հաննանտը:

«Շաբաթական ավելացնելով 150,000 լիտր հնացած գարեջում՝ մայիսին մենք ստացանք ռեկորդային 355.200 խորանարդ մետր բիոգազ, իսկ հունիսին ևս 320,000 խմ, ինչը բավարար է 1200 տուն էներգիայով ապահովելու համար»,-հավելել է նա:

Ավստրալիայիում կորոնավիրուսով պայմանավորված արգելափակումները, որոնք սկսեցին կիրառվել մարտի վերջից, մեծ հարվածներ են հասցրել տեղացի գարեջրագործներին:

Մայիսին Lion Beer Australia-ն՝ երկրի խոշորագույն գարեջրագործներից մեկը, հայտարարեց, որ թափում է շուրջ 4,5 միլիոն լիտր անպիտան գարեջուր:

Գարեջուրը տեղափոխվեց կեղտաջրերի մաքրման կայաններ՝ կենսագազ ստանալու համար, որը կարող է օգտագործվել նաև գարեջրի պատրաստման համար, հայտնում է 7News-ը: