12.10.2026 | 10:49
Կոլումբոսի օրվա կապակցությամբ Հայաստանում ԱՄՆ դեսպանատունը փակ է
Կորոնավիրուսի դեմ պայքարում հույսի նշույլներ են նկատվում. ԱՀԿ ղեկավար
Քաղաքականություն
11.08.2020 | 15:59
Առողջապահության համաշխարհային կազմակերպության ղեկավար Թեդրոս Ադհանոմ Ղեբրեյեսուսը երեկ կայացած ճեպազրույցի ժամանակ ասել է, որ նոր կորոնավիրուսի դեմ պայքարում հույսի նշույլներ են նկատվում: Այս մասին տեղեկանում ենք ԱՀԿ պաշտոնական կայքից:
«Այս շաբաթ աշխարհում վարակակիրների թիվը կհասնի 20 միլիոնի, իսկ մահերինը՝ 750 000-ի:
Այս վիճակագրության հետևում մեծ ցավ և տառապանք կա:
Յուրաքանչյուր կյանք մեզ համար կարևոր է:
Գիտեմ, որ ձեզանից շատերը վշտացած են, և որ սա ողջ աշխարհի համար դժվար ժամանակաշրջան է, սակայն ցանկանում եմ հստակություն մտցնել: Հույսի նշույլներ են նշմարվում, և անկախ նրանից, թե որտեղ է գտվում երկիրը, շրջանը, քաղաքը կամ գյուղը, երբեք ուշ չէ կանխել վարակի բռնկումը»,- ասել է նա:
Ղեբրեյեսուսը ընդգծել է երկու կարևոր քայլ պայքարի արդյունավետությունը բարձրացնելու համար. առաջնորդները պետք է արագացնեն քայլերը, իսկ քաղաքացիները պետք է ընդունեն նոր միջոցառումերը:
«Նոր Զելանդիային, Ռուանդային, Կարիբյան ծովում և Խաղաղ օվկիանոսում գտնվող մի շարք պետությունների հաջողվել է համաճարակը կանգնեցնել վաղ փուլում։ Նոր Զելանդիան կորոնավիրուսի դեմ պայքարի համաշխարհային օրինակ է հանդիսանում: Հանգստյան օրերին Նոր Զելանդիայի վարչապետ Ջասինդա Արդերը հայտարարեց, որ արդեն 100 օր է՝ վարակի փոխանցման նոր դեպքեր չեն արձանագրվել երկրում՝ միաժաամանակ կոչ անելով քաղաքացիներին պահպանել զգոնությունը»,- հավելել է ԱՀԿ-ի ղեկավարը:
Վիրուսի բռնկման դեպքեր են եղել նաև Ֆրանսիայում, Գերմանիայում, Կորեայի Հանրապետությունում, Իսպանիայում, Իտալիայում: «Բայց երբ նրանք քայլեր են ձեռնարկել, կարողացել են ճնշել վիրուսի տարածումը»,-ընդգծել է Ղեբրեյեսուսը:
«Մենք բոլորս ցանկանում ենք, որ դպրոցները վերաբացվեն, բայց դրա հետ մեկտեղ պետք է ապահովենք աշակերտների և աշխատողների անվտանգությունը: Դրա համար անհրաժեշտ է համայնքներում պատշաճ ձևով վերահսկել վարակի հնարավոր փոխացման ուղիները:
«Իմ կոչը հստակ է. ճնշել, ճնշել և ևս մեկ անգամ ճնշել վիրուսը»,- նշել է նա։
Նշենք, որ օգոստոսի 11-ի դրությամբ՝ ամբողջ աշխարհում նոր տեսակի կորոնավիրուսով վարակվածների թիվը անցել է 20 միլիոնը: COVID-19-ի պատճառով մահացել է մոտ 750,000 մարդ:
