29.08.2026 | 17:05
ՀՀ արդարադատության նախարարի 4 տեղակալները վերանշանակվել են պաշտոններում
Արտագնա աշխատանքի չմեկնած շիրակցիները հնարավորություն ունեն աշխատելու տեղական շինարարությունում
Հասարակություն
11.08.2020 | 16:06
Կորոնավիրուսի համավարակով պայմանավորված՝ արտագնա աշխատանքի մեկնողներն այս տարի մնացել են Հայաստանում։ Գաղտնիք չէ, որ Շիրակի մարզի տարբեր համայնքների բնակիչների մեծ մասն էլ իր ապրուստը վաստակում է հենց արտագնա աշխատանքով։ Մարզն այժմ տնտեսապես բարդ իրավիճակում է, արտագնա աշխատանքի մեկնելու հնարավորության բացակայությունն էլ լրացուցիչ սոցիալական լարվածություն է առաջացնում։
Ստեղծված իրավիճակում Կառավարությունն իր տարբերակն է առաջարկում՝ աշխատանք տեղական շինարարությունում։ Մարզպետարաններին հանձնարարված է արտագնա աշխատանքի չմեկնածների տվյալների բազա կազմել։
ՀՀ տարածքային կառավարման և ենթակառուցվածքների նախարարության հանձնարարականով Շիրակի մարզպետարանում ևս աշխատանքներ են իրականացվել COVID-19 համավարակի պատճառով արտագնա աշխատանքի չմեկնած աշխատուժի բացահայտման և տվյալների բազա կազմելու ուղղությամբ: Ստեղծվել է օնլայն հարթակ, որտեղ գրանցվելու հնարավորություն են ունեցել մարզում ապրող շինարարները։
Շիրակի մարզպետարանի տեղեկատվության ու հասարակայնության հետ կապերի բաժնից մեզ փոխանցեցին, որ շինարարական աշխատանքներ կատարելու հմտություն, փորձառություն ունեցող շուրջ 2700 քաղաքացի է գրանցվել հարթակում։
«Հավաքագրված տվյալները մարզպետարանի պատասխանատուներն ամբողջացրել և ներկայացրել են ՀՀ տարածքային կառավարման և ենթակառուցվածքների նախարարություն և թվով 11 շինարարական ընկերությունների։ Շիրակի մարզպետ Տիգրան Պետրոսյանը հանդիպում է ունեցել շինարարական կազմակերպությունների պատասխանատուների հետ, քննարկվել են առաջիկա կառուցապատման աշխատանքներում գրանցված մասնագետներին ներգրավելուն վերաբերող հարցեր»,- փոխանցեցին Շիրակի մարզպետարանից։
Օնլայն հարթակում գրանցված շինարարները հնարավորություն ունեն աշխատելու մարզում իրականացվող տարբեր շինարարական ծրագրերում։ Շիրակում իրականացվում է 63 սուբվենցիոն ծրագիր և աշխատուժի կարիք կա։
«Շիրակի մարզի ներկայացրած և հավանության արժանացած 63 սուբվենցիոն ծրագրերից 53-ը շինարարական են։ Տնտեսական և սոցիալական ենթակառուցվածքների զարգացմանն ուղղված սուբվենցիոն ծրագրերի իրականացման շնորհիվ մարզում ստեղծվելու է 580-780 ժամանակավոր և մինչև 130 հիմնական աշխատատեղ»- հայտնեցին Շիրակի մարզպետարանից։
