Հաշմանդամ կնոջը բնակարան են նվիրել 12-րդ հարկում․ մի դրվագ զոհվածի մոր կյանքից

Ալվինա Մարգարյանը զգեստապարանի խորքերում պահում է որդու` Զորիկի զինվորական համազգեստը։ Երբեմն հանում է, արդուկում ու կրկին հետ դնում։ Դեկտեմբերի 27-ին տղան կդառնար 27 տարեկան, եթե 5 տարի առաջ, 2012 թվականին չմահանար հրազենային վնասվածքից։ Նա հայկական բանակ էր գնացել որպես կամավոր։ Սկզբում չեն ցանկացել զորակոչել։ Ոչ քաշն էր բավարար, ոչ հասակը։ Մի քանի անգամ դիմելուց հետո տարել են։ Զոհվել է զորացրվելուց երկու ամիս առաջ։ Զորիկ Մարգարյանին հետմահու պարգևատրել են շքանշանով։ Մահվան փաստով քրեական գործ է հարուցվել, քննիչը 4 հատոր նյութեր է հավաքել, վերջում վարույթը կասեցրել է:

«Նախաքննությամբ պարզվել ու հիմնավորվել է, որ ժամկետային զինծառայող Մարգարյանը մահացու հրազենային վիրավորում է ստացել, և գործում է նախաքննությանը ժամանակավորապես խոչընդոտող անհաղթահարելի ուժ, ու այդ պայմաններում հնարավոր չէ պարզել կրակողի ինքնությունն ու լուծել նրան քրեական պատասխանատվության ենթարկելու հարցը», – գրված է փորձագետի եզրակացության մեջ։

Իսկ զինվորի մորը՝ տիկին Ալվինային, բացատրեցին․ Զորիկը զոհվել է ազերու գնդակից, մարտական հերթապահության ժամանակ։ Ալվինայի հոգում չփարատված կասկածներ մնացին։ Գործով զբաղվեցին «Հելսինկյան ասոցիացիա» կազմակերպության իրավապաշտպանները։ 8 ամիս պայքարելուց հետո վերջապես ստացան քննիչի որոշումների պատճենները։ Դրանցից պարզ դարձավ, որ նախաքննական մարմինը ևս մեկ վարկած է ունեցել, համաձայն որի՝ սպանությունը կատարվել է հայ զինվորականի կողմից արձակված կրակահերթի միջոցով: Ալվինան բողոքեց, հասավ մինչև պաշտպանության նախարար Սեյրան Օհանյանի աշխատասենյակ։ Անօգուտ։ Տղայի մահված առեղծվածն այդպես էլ չբացահայտեց։ Երկու տարի առաջ Ալվինան՝ որպես զինվորի մայր, բնակարան ստացավ Սիսակյան 16 նորակառույց շենքի 12-րդ հարկում։ Բայց կահավորել այն չի կարողանում։ Գալիս է, նայում է, ուրախանում է, որ նոր տուն ունի ու հետ է գնում հանրակացարանի նեղ սենյակը։ Այստեղ նա ապրում է ամուսնու, որդու և նրա երկու երեխաների հետ։ Տղան Ռուսաստանում է, և Ալվինան ու ամուսինը առայժմ ապրելու տեղ ունեն։

Հաշմանդամ կինը 31 հազար դրամ է ստանում պետությունից որպես նպաստ, այդքան էլ ստանում է նրա ամուսինը, որը նույնպես հաշմանդամ է, գումարած զոհված որդու համար նշանակված թոշակը՝ 80 հազար դրամ։ Այս եկամուտներով ընտանիքը ապառիկ լվացքի մեքենա, գազօջախ և սառնարան է ձեռք բերել։ Եթե ամեն ինչ բարեհաջող լինի, մուծումները կավարտեն 2018 թվականի վերջին։

Սյուզան Սիմոնյան