Մայդան չի լինելու. Լուկաշենկո

Բելառուսում տեղի ունեցած բողոքի ցույցերի պատասխանը կլինի «համարժեք», բայց «Մայդան չի լինելու», Բելառուսի նախագահ Ալեքսանդր Լուկաշենկոն հայտարարել է БелТА-ի հետ զրուցելիս: Այս մասին հաղորդում է Forbes-ը:

«Այս խառնաշփոթը փորձում են փաթաթել մեր վզին: Ես զգուշացրել եմ. Մայդան չի լինելու, ինչքան էլ դա ցանկալի լինի որոշ մարդկանց համար: Դրա համար պետք է հանգստանալ»,-ասել է նա:

Լուկաշենկոն ծնողներին խորհուրդ է տալիս «նայել, թե որտեղ են իրենց երեխաները, որ հետո ցավալի չլինի»:

«Մոտ 25 ՕՄՕՆ-ական է վիրավորվել: Նրանք ունեն ձեռքի և ոտքի կոտրվածքներ: Այս տղաներին միտումնավոր են հարվածել, և նրանք պատասխանել են: Ինչի՞ համար եք հիմա լացում: Այդ պատճառով էլ, մեր պատասխանը կլինի համարժեք: Մենք թույլ չենք տա, որ երկիրը քանդվի,» – ասել է Լուկաշենկոն:

Ըստ նրա՝ բողոքի ցույցերի կազմակերպիչները փորձել են «հրդեհել» Մինսկի կենտրոնը:

Լուկաշենկոն գիտի, թե որտեղից են ղեկավարվում «խամաճիկները»:

«Այսօր Չեխիայից ղեկավարում են մեր համատեղ շտաբը, որտեղ, կներեք ինձ, նստած են այս ոչխարները՝ անգամ չհասկանալով՝ ինչ են ուզում իրենցից»,- ասել է Լուկաշենկոն՝ նկատի ունենալով իր հիմնական մրցակցի՝ Սվետլանա Տիխանովսկայային և նրա թիմակիցներին:

Մենք կլուծենք մեր հարցերը յուրաքանչյուրի հետ, ով դրդում է այս երեխաներին նման անկարգությունների դիմել: Կարծում եմ, որ նրանց ուղեղը կաշխատի ճիշտ ուղղությամբ, և նրանք կհասկանան, որ այրում են իրենց ոտքերի տակի հողը: Մենք դա թույլ տալ չենք կարող» – հավելել  է Լուկաշենկոն:

Նա նշել է, որ իրավիճակը լրիվ այլ կլիներ, եթե ցուցարարները հասնեին նախագահական նստավայր՝ «Անկախության պալատ », ուստի «լավ է, որ ոստիկանները նրանց ետ են պահել»:

Հիշեցնենք, որ ԿԸՀ-ի տվյալներով՝ երեկ կայացած նախագահական ընտրություններում Ալեքսանդր Լուկաշենկոն ստացել է 80,23% ձայն, իսկ Սվետլանա Տիխանովսկայան՝ 9,9% ձայն: Տիխանովսկայան հայտարարել է, որ իրեն հաղթող է համարում: Քվեարկության արդյունքները հայտարարելուց հետո երկրի 33 բնակավայրում սկսվել են բողոքի ցույցեր, որոնց արդյունքում տեղի են ունեցել բախումներ ցուցարարների և ոստիկանների միջև: Շուրջ 3000 ցուցարար բերման է ենթարկվել: