ՀՔԾ-ն մերժել է ՀՅԴ, «Հայրենիք» և ԲՀԿ կուսակցությունների դիմումը

Արտախորհրդարանական երկու ուժեր՝ ՀՅԴ-ն ու «Հայրենիք»-ը, ինչպես նաև խորհրդարանական ԲՀԿ-ն հայտնել էին իշխանության զավթման, Սահմանադրական կարգի բռնի տապալման և պաշտոնեական լիազորությունները անցնելու վերաբերյալ հաղորդում էին ներկայացրել։ Այսօր հրավիրված ասուլիսի ժամանակ ՀՅԴ-ից Արծվիկ Մինասյանը ասաց, որ ՀՔԾ-ն մերժել է այն, իսկ իրենք որոշել են բողոքարկել։

«Այս պահին մենք որոշել ենք բողոք բերել դատախազություն, իսկ հետագա գործողությունները ցույց կտան, թե հետագայում ինչպես վարվենք»,- հավելեց նա։

Մինասյանի խոսքով՝ ՀՔԾ քննիչը պատշաճ չի ուսումնասիրել դիմումը և խիստ սուբյեկտիվ մեկնաբանություններ է տվել․ «Ավագ քննիչը, խեղաթյուրելով պատգամավորի անձեռնմխելիության ինստիտուտը, արհեստականորեն համեմատել է այն պատգամավորի՝ օրենսդրական նախաձեռնությամբ հանդես գալու իրավունքի հետ և հանգել եզրակացության, որ դա իրենց իրավունքն է եղել»։

«Հայրենիք» կուսակցության ներկայացուցիչ Արսեն Բաբայանը, ներկայացնելով, թե ինչու են բողոքը ներկայացնում դատախազություն և ոչ թե միանգամից դատարան, ասաց՝ դա օրենքի պահանջն է։

«Այնպես չէ, որ անձամբ ես հույս ունեմ, թե Դատախազությունը կբավարարի մեր բողոքը։ Մենք չէինք էլ կարծում, որ ՀՔԾ-ն կհամարձակվի, կունենա այդքան դուխ, որ հարուցի քրեական գործ»,- նշեց Բաբայանը։

«Բարգավաճ Հայաստան» կուսակցության պատգամավոր Իվետա Տոնոյանն էլ հավելեց, որ շուրջ երկու տարի ՀՀ իշխանությունները «լծված են եղել ՍԴ-ն զավթելու» գործին․ «Մեկ տարի շարունակ իշխանության ներկայացուցիչների կողմից նշվում էր՝ ՍԴ-ում կա ճգնաժամ, ինչն իրականությանը չէր համապատասխանում, և մենք այդ մասին բազմիցս խոսել ենք։ Բայց արդեն կարող ենք ասել, որ իշխանությունների ձեռքով ՍԴ-ում ճգնաժամ կա, և հաղորդումը նաև հենց դրա մասին էր»։

Լիլիթ Շաբոյան