Հունվար-հունիսին 6.1%-ով հանցագործությունների աճ է գրանցվել՝ նախորդ տարվա նույն ժամանակաշրջանի համեմատ

Այս տարվա առաջին կիսամյակում հանրապետությունում գրանցվել է 13․003 հանցագործություն՝ նախորդ տարվա նույն ժամանակահատվածի 12․250-ի փոխարեն։ Այս մասին տեղեկանում ենք պետական վիճակագրական ծառայության տվյալներից։

Այսպիսով՝ 2020-ի հունվար-հունիսին հանցագործությունների 6․1% աճ է գրանցվել։

Ոչ ծանր հանցագործությունները 6.783-ն են՝ նախորդ տարվա 6․328-ի փոխարեն, միջին ծանրության հանցագործությունները՝ 3․985՝ նախորդ տարվա 3․976-ի փոխարեն։ Աճել է ծանր և առանձնապես ծանր հանցագործությունների թիվը․ ծանր հանցագործությունները՝ 2․076՝ նախորդ տարվա 1․812-ի փոխարեն, առանձնապես ծանր հանցագործությունների թիվը 159 է՝ նախորդ տարվա 134-ի փոխարեն։

9․3%-ով աճել են դիտավորությամբ առողջությանը վնաս հասցնելու դեպքերը՝ 515՝ նախորդ տարվա 471-ի փոխարեն։

14%-ով աճ է գրանցվել հասարակական անվտանգության, հասարակական կարգի և բնակչության առողջության դեմ ուղղված հանցագործությունների ցուցանիշներում։ Այս տարի գրանցված դեպքերը եղել են 2․124՝ նախորդ տարվա 1․863-ի փոխարեն։ Մասնավորապես, աճել են խուլիգանության դեպքերը՝ 30%-ով, թմրամիջոցների հետ կապված հանցագործությունները՝ 18․9%-ով, հասարակական անվտանգության, հասարակական կարգի և բնակչության առողջության դեմ ուղղված այլ հանցագործությունները՝ 125%-ով։

7․5%-ով աճել են սեփականության դեմ ուղղված հանցագործությունների դեպքերը՝ կազմելով 6․745՝ նախորդ տարվա 6․273-ի փոխարեն։

44․1%-ով աճել են տնտեսական գործունեության դեմ ուղղված հանցագործությունները՝ կազմելով 428՝ նախորդ տարվա 297-ի փոխարեն։

Նվազել է պետական իշխանության, ծառայության և կառավարման կարգի դեմ ուղղված հանցագործությունների թիվը՝ 11․4%-ով։ Այս տարվա հունվար-հունիս ամիսներին գրանցվել է 1․439 դեպք՝ նախորդ տարվա 1․604-ի փոխարեն։

Նվազել են նաև ճանապարհային երթևեկության և տրանսպորտային միջոցների շահագործման կանոնները խախտելու դեպքերը՝ 22․5%-ով․ այս տարի դրանց թիվը կազմել է 559՝ նախորդ տարվա 685-ի փոխարեն։ Այս խախտումների հետևանքով մահվան ելքերի թիվը նույնպես նվազել է՝ նախորդ տարվա 109-ի փոխարեն կազմելով 75։

Անժելա Պողոսյան