Տնտեսություն
06.08.2020 | 12:08Դեռևս տարիներ առաջ արձանագրված խնդիրը, որ շատ համայնքներում աշխատատեղերի պակաս կա, միևնույն ժամանակ կա նաև աշխատուժի պակաս, այժմ էլ ակտուալ է։ Այս մասին այսօր Կառավարության նիստին ասաց ՀՀ վարչապետ Նիկոլ Փաշինյանը։
«Օրեր առաջ ինձ լուսանկարներ ուղարկեցին Տավուշի մարզի Պառավաքար գյուղից, որտեղ երևում էր, թե ինչպես են ակնհայտ օտարերկրյա քաղաքացի հանդիսացող մարդիկ բանվորական աշխատանք կատարում ընկերություններից մեկում։ Քանի որ այդ ընկերության ներկայացուցիչը մասնակցում էր մեր մի աշխատանքային քննարկմանը, ես հետաքրքրվեցի, թե ի՞նչ է տեղի ունենում, ի՞նչն է պատճառը, որ իրենք օտարերկրյա ներուժ են ներգրավում։ Պարզվեց՝ այն խնդիրը, որ մենք արձանագրել ենք դեռևս 2018 թվականին, դեռևս գոյություն ունի»,- նշեց Փաշինյանը։
Նրա խոսքով՝ 2 օրից Պառավաքարում նոր արտադրամաս է բացվելու՝ մոտավորապես 200 աշխատակցով, և աշխատուժի հարցը դեռևս լուծված չէ։
«Նույնիսկ ճգնաժամի պայմաններում, երբ թվում է՝ ամեն աշխատատեղ պետք է մեծ պահանջարկ ունենա, ունենք նման խնդիր, և սա ռազմավարական հարց է, պետք է մտածենք՝ այս խնդիրն ինչպես ենք լուծում։ Իմ այս խոսքից հետո կհնչեն բազմաթիվ փաստարկեր, այդ թվում՝ աշխատավարձի ցածր լինելու մասին, բայց ես չեմ կարծում, թե կա մի աշխատավարձ, որը ցածր է զրոյից։ Այսինքն՝ եթե մենք ուղղակի որևէ աշխատանքով զբաղված չենք, չաշխատանքի եկամուտը չի կարող ավելի բարձր լինել, քան որևէ աշխատանք։ Օրինակ՝ այդ օտարերկրացիները, ասում էին, որ աշխատում են օրը 5 հազար դրամով, և «Տավուշ Տեքստիլ» ընկերության ներկայացուցիչն ասում էր, որ օրական 8-10 հազար դրամով իրենք տեղում աշխատուժ գտնել չեն կարողանում»,- ասաց վարչապետը։
Մանրամասները՝ տեսանյութում։
