14.06.2026 | 23:18
Գիշերվա կեսին գողացան ժողովրդի քվեն. Տոնոյանը` ԿԸՀ-ի որոշման մասին. ՏԵՍԱՆՅՈւԹ
Ռուսաստանի հայերի միությունը դատապարտել է ռուսական ԶԼՄ-ներում բարձրացված հակահայկական հիստերիան
Հասարակություն
01.12.2017 | 15:01
Ռուսաստանի հայերի միությունը հայտարարություն է տարածել՝ կապված ՀՀ-ԵՄ համաձայնագրի ստորագրումից հետո ռուսաստանյան ԶԼՄ-ների շրջանում բարձրացած հակահայկական հիստերիայի հետ: Հայտարարության մասնակի թարգմանությունը՝ ստորև.
«ՀՀ-ի և ԵՄ-ի միջև համապարփակ և ընդլայնված համագործակցության համաձայնագրի ստորագրումից հետո ռուսական մի շարք ԶԼՄ-ների որոշ տգետ կամ ծախու լրագրողներ ու քաղաքական գործիչներ հակահայկական քարոզարշավ են սկսել, որտեղ փորձել են համաձայնագիրը ներկայացնել, որպես ՀՀ քաղաքականության փոփոխություն, դաշնակից Ռուսաստանի և ԵՏՄ-ի հանդեպ դավաճանություն և ընդհանրապես, որպես հայկական քաղաքականության վեկտորի փոփոխություն:
Ոմանք հավասարության նշան են դնում Հայաստանի քաղաքականության և այն գծի միջև, որը տանում են Ուկրաինան, Վրաստանը և Մոլդովան: Դժվար է հասկանալ՝ ի՞նչն է այստեղ ավելի շատ. անտեղյակությո՞ւնը, թե՞ արտաքին ուժերի շահերը սպասարկումը, որոնք ցանկանում են լարվածություն ստեղծել ռուս-հայկական հարաբերություններում, սեպ խրել ՀԱՊԿ-ի և ԵՏՄ-ի դաշնակիցների միջև:
Եթե այդ վայ-փորձագետները չզլանային կարդալ համաձայնագրի տեքստը, ապա նրանց համար միանգամայն ակնհայտ կլիներ, որ այդ համաձայնագիրը որևէ աղերս չունի այն համաձայանագրի հետ, ինչ ԵՄ-ի հետ ստորագրել են Ուկրաինան, Վրաստանը և Մոլդովան: Այդ համաձայնագիրը ստորագրվել է դաշնակիցների առաջ Հայաստանի ունեցած բոլոր պարտավորությունների երաշխավորված պահպանման պայմանով, և այն չի ենթադրում Հայաստանի մուտքը ԵՄ տնտեսական տարածք և ոչ մի սպառնալիք չի ներկայացնում ԵՏՄ-ի անդամ երկրների շահերի համար:
Այդ ծայրահեղ անպատասխանատու լրագրողների և քաղաքական գործիչների գործողությունները համընդհանուր զայրույթ են առաջացրել ինչպես Հայսատանում, այնպես էլ Ռուսաստանի բազմամիլիոնանոց հայկական համայնքում՝ որպես երկրների միջև խնդիրներ ստեղծելու և ռուս հասարակության աչքում Հայաստանի բացասական կերպար ստեղծելու փորձ: Հայաստանն այն քիչ երկրներից է նույնիսկ ԵՏՄ անդամների շարքում, որոնք հետևողականորեն աջակցում են Ռուսաստանին՝ ինչպես Ղրիմի, այնպես էլ ռուսական արտաքին քաղաքականության մի շարք այլ զգայուն հարցերում:
Մենք դիմում ենք իշխանություն ունեցող կառույցներին՝ պահանջելով եթերից հեռացնել ծախու լրագրողներին, վայ-քաղաքական գործիչներին, որոնց դիրքորոշումը որևէ կերպ արձագանք չի գտնում ռուսական հանրության շրջանում»:
