«Ստիպված են լինելու մեզ ծեծելով հեռացնել». Ամուլսարի տարածքում լարված իրավիճակ է․ ՏԵՍԱՆՅՈՒԹ

Ամուլսարի հարակից տարածքում երեկոյան ինքնաբուխ հավաք է նախատեսվում: Բնապահպանական խնդրով մտահոգված ջերմուկցիներին միանալու են նաև Երևանից և այլ բնակավայրերից քաղաքացիներ: Լուսադեմին հանքի հարակից տարածքում լարված իրավիճակ է եղել: Ամուլսարի պահապանների ժամանակավոր կացարանները, ըստ Ջերմուկի բնակիչ, բնապահպան Շիրակ Բունիաթյանի, հեռացվել են «Լիդիան Արմենիա» ընկերության կողմից վարձակալած աշխատակիցների կողմից:

Շիրակ Բունիաթյանն ասաց, որ ջերմուկցիներն ինքնաբուխ հավաքվել են քաղաքի կենտրոնում և սպասում են Երևանից մեկնող ակտիվիստներին: Նրանք պատրաստվում են հանքի տարածքից հանրային պահանջ հղել Կառավարությանը։

Բունիաթյանը Factor TV-ի հետ զրույցում ընդգծեց՝ եթե Կառավարությունը քայլեր չձեռնարկի, ապա արյունահեղություն կլինի: Ըստ նրա՝ եթե պարզվի, որ գործադիրը որոշել է թույլ տալ Ամուլսարի հանքը շահագործել, ապա իրենց ստիպված կլինեն ծեծելով հեռացնել տարածքից:

Իրավաբան-բնապահպան Նազելի Վարդանյանն Ամուլսարի պահապանների վագոն-տնակների հեռացումը որակում է սադրանք: Ըստ նրա՝ այն տարածքը, որտեղ տեղադրված էին պահապանների վագոն-տնակները, որևէ կապ չուներ «Լիդիան Արմենիայի» վարձակալած տարածքի հետ: Բնապահպանն այստեղ իրավապահների անգործությունն է նկատում: Նազելի Վարդանյանի պնդմամբ՝ ջերմուկցիների ստորագրությունը և ավագանու որոշումը բավարար էին, որ իրավապահ համակարգը կասեցներ հանքի շահագործումը:

Ի դեպ, Ամուլսարի խնդրին առայժմ չի անդրադարձել շրջակա միջավայրի նորանշանակ նախարար, ՔՊ-ական Ռոմանոս Պետրոսյանը: Այսօր նախարարության շենքի մոտ բողոքի ակցիա է կազմակերպվել, սակայն բնապահպանների հետ հանդիպում չի եղել:

Մանրամասները՝ տեսանյութում։

Նարեկ Կիրակոսյան