Կառավարության որոշմամբ Երևանի «թոքերը»՝ Նորքի այգիները հանվել են աճուրդի

«Կանաչ ապագա» բնապահպանական շարժման անդամ Վահագն Վարագյանը այսօր ֆեյսբուքյան իր էջում գրել է, որ Նորքի այգիները հանվել են վաճառքի, և դա որակել է որպես հերթական խայտառակություն։ Factor.am-ը պարզեց, որ այս որոշումը նոր չէ, այն ՀՀ Կառավարության կողմից ընդունվել է ավելի քան մեկ ամիս առաջ։

Տարածքային կառավարման և ենթակառուցվածքների նախարարության պետական գույքի կառավարման կոմիտեին ամրացված` պետական սեփականություն հանդիսացող Երևանի Նորք-Մարաշ, Նորքի այգիներ փողոց 180 հասցեում գտնվող 2018.12 քառ. մետր մակերեսով շենք-շինությունները և դրա օգտագործման և սպասարկման համար հատկացված 1.84 հա մակերեսով հողամասը մրցույթով օտարելու որոշումն ընդունվել է Կառավարության հունիսի 25-ի նիստում։

Մրցույթով օտարման ենթակա գույքի նվազագույն գինը սահմանվել է գնահատված արժեքի 100%-ի չափով, այն է՝ 1 մլրդ 333 մլն 763 հազար 159 դրամ։ Օտարման առաջարկվող գույքը Պետական գույքի կառավարման կոմիտեին է հանձնվել 2002 թվականին, գույքը բաղկացած է առողջապահական բժշկական կենտրոնի շենք-շինություններից և հողամասից, փաստացի որևէ սուբյեկտի կողմից չի շահագործվում։

«Կանաչ ապագա» բնապահպանական շարժման անդամ ակտիվիստի խոսքով՝ այս վաճառքի իրականացման դեպքում երևանցիները ստիպված են լինելու մոռանալ թթվածին շնչելու մասին․ «Ողջ աշխարհում գլոբալ տաքացման դեմ պայքարում են անտառածածկ տարածքների ավելացմամբ, իսկ ի՞նչ են անում Հայաստանի վարչապետն ու Երևանի քաղաքապետը: Մայրաքաղաքում փոխանակ անտառային շերտերը ու կանաչ գոտիներն ավելացնեն, օրը ցերեկով Մաշտոցի պուրակի առողջ ծառեր են հատում, որի հետևանքով վերանում է ոչ միայն կանաչ գոտին, այլև տարիներ շարունակ գործունեություն ծավալած պայքարիստների մի ողջ տեսակ, որը հիմա կամ պետական բարձր պաշտոնների է, կամ էլ կողքից դրանց սատարող արտահաստիքային ֆեյսբուքյան ստատուսագրի գործ է անում: Այս տարի Ծիծեռնակաբերդի բարձունքում մեկ հեկտարից ավել կանաչ գոտի վառվեց, որովհետև Երևանի խեղկատակ քաղաքապետը «մոռացել էր» խոտն ու ծառերը ամռան ամիսներին ջրել: Ձայն չկա: Այս տարի Հայաստանի անտառների 11.575 հեկտարը կերել են թրթուրները՝ Շրջակա միջավայրի նախարարության տոտալ անգործության հետևանքով, ձայն չկա: Եվ սա այն դեպքում, երբ վերջին 2 տարիների ընթացքում սովորական սպառողի համար փայտի մեկ խորանարդ մետրի գինը 12.000 դրամից դարձել է 30.000 դրամ: Այսինքն՝ կառավարության մատը մատին չտալու հետևանքով գյուղացին, որ գազով տաքանալու համար համապատասխան եկամուտներ չունի, դժվարություններ ունի նաև վառելափայտով տաքանալու հարցում: Բայց Նորքի այգիների հարցն այդ դեպքը չէ: Հավատացեք, Նորքի 2 հեկտար այգիների տարածքի վաճառքի դեպքում երևանցիները ստիպված են լինելու մոռանալ թթվածին շնչելու մասին»:

Ըստ Պետական գույքի կառավարման կոմիտեի՝ Նորքի այգիների օտարման մրցույթը տեղի կունենա 2020 թվականի օգոստոսի 11-ին ժամը 15:00-ին, Պետական գույքի կառավարման կոմիտեում։