Քաղաքականություն
01.12.2017 | 13:24
ԵՄ Արևելյան գործընկերության Քաղաքացիական հասարակության ֆորումի Հայաստանի ազգային պլատֆորմը հայտարարություն է տարածել: Հայտարարությունում ասվում է.
«ԵՄ Արևելյան գործընկերության Քաղաքացիական հասարակության ֆորումի Հայաստանի ազգային պլատֆորմը ողջունում է Հայաստանի Հանրապետության և Եվրամիության միջև Համապարփակ և ընդլայնված գործընկերության համաձայնագրի կնքման փաստը։
Ազգային պլատֆորմը վստահ է, որ պայմանագիրն իրատեսական հիմքեր է սահմանում Հայաստանի Հանրապետության և Եվրոպական միության միջև համակողմանի քաղաքական, տնտեսական հարաբերությունների զարգացման և մեր երկրում արմատական բարեփոխումների իրականացման համար:
Միևնույն ժամանակ համոզված ենք, որ Համաձայնագրի ստորագրումը ոչ թե վերջնանպատակ է, այլ երկարաժամկետ և ջանքեր պահանջող գործընթացի սկիզբ և դրա իրականացման համար պատասխանատվություն` ինչպես համաձայնագրի կողմերի, այնպես էլ Հայաստանի քաղաքացիական հասարակության համար: Այս առումով Հայաստանի իշխանություններից պահանջվում է հետևողական և պատասխանատու մոտեցում փաստաթղթով նախատեսված հանձնառությունների կատարման նկատմամբ, բոլոր շահագրգիռ դերակատարների, այդ թվում և քաղաքացիական հասարակության իրական ներգրավվածության ապահովում: Մասնավորապես, հատուկ կարևորություն ենք տալիս իշխանության և քաղաքացիական հասարակության միջև արդյունավետ երկխոսության մեխանիզմների ձևավորմանը, այդ թվում` հատկապես համաձայնագրով նախատեսվող գործողությունների իրականացման նկատմամբ քաղաքացիական հասարակության կողմից արդյունավետ և մշտական մոնիթորինգի իրականացման մեխանիզմների հաստատմանը:
Հուսով ենք նաև, որ իշխանությունները, անդավաճան մնալով իրենց քաղաքական հայտարարություններին, կապահովեն քաղաքացիական հասարակության լիարժեք մասնակցությունը: ՔՀՖ Հայաստանի ազգային պլատֆորմը, հավատարիմ մնալով վերջին տարիներին հրապարակած իր հայտարարություններում ներկայացված առաջարկություններին և պահանջներին, դրանց հասցեատեր համապատասխան պետական կառույցներից պահանջում է վճռական քայլեր մարդու իրավունքների, հիմնարար ազատությունների, ժողովրդավարական ինստիտւտների ոլորտներում խնդրիների լուծման ուղղությամբ: Դրանով կարտահայտվի երկրի բազմակողմանի զարգացմանը միտված քաղաքական կամքի առկայությունը:
Մենք կոչ ենք անում նաև Եվրամիության կառույցներին, ԵՄ անդամ պետություններին՝ Համաձայնագրի շրջանակներում իրականացվելիք բարեփոխումների գնահատման ընթացքում դրսևորել սկզբունքայնություն և հետևողականություն:
Հուսով ենք, որ այդ գործում կապահովվի Համաձայնագրի կատարման վերաբերյալ հաշվետվողականության խստապահանջությունը, անաչառությունը, դրա կենսագործման ամբողջ գործընթացի թափանցիկությանը և դրանում քաղաքացիական հասարակության, այդ թվում` ԱլԳ ՔՀՖ Հայաստանի ազգային պլատֆորմի կազմակերպությունների ներգրավումը` իրականացվելիք գործողությունների առաջնահերթությունների մշակման, ծրագրերի իրականացման և գնահատման, ինչպես նաև Համաձայնագրի իրականացման մոնիթորինգի ոլորտներում:
Մենք վստահեցնում ենք, որ ԱլԳ ՔՀՖ Հայաստանի ազգային պլատֆորմի կազմակերպությունները, գիտակցելով նաև իրենց պատասխանատվությունը, ակտիվ մասնակցությունը կունենան և հետամուտ կլինեն Համաձայնագրով նախատեսված գործողությունների իրականացմանը»:
