Վարակի պայմաններում հավաքների ազատության սահմանափակումը հիմնավոր և տրամաբանված է․ Դանիել Իոաննիսյան․ ՏԵՍԱՆՅՈՒԹ

Պետք է սահմանափակումները վերանայվեն: Հավաքների բացարձակ, ամբողջական արգելքը ևս տրամաբանական և հիմնավոր չէ: Գոնե առ այսօր ամբողջական արգելքի հիմնավորում ես չեմ լսել։ Մարդու իրավունքների պաշտպանի և մի շարք հասարակական կազմակերպությունների համագործակցությամբ անցկացվող «Հավաքների ազատությունը նոր տեսակի կորոնավիրուսային (COVID-19-ի) համաճարակի հիմքով հայտարարված արտակարգ դրության պայմաններում» թեմայով առցանց քննարկման ժամանակ նման կարծիք հայտնեց «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանը:

Նա շեշտեց, որ սա ոչ միայն իր մոտեցումն է, այլ Հանրային խորհրդի: Միևնույն ժամանակ, Դանիել Իոաննիսյանն ասաց, որ արտակարգ դրության պայմաններում հավաքների ազատության սահմանափակումները հիմնավոր և տրամաբանական են:

Նա որպես օրինակ բերեց ԲՀԿ հավաքը, որից օրեր անց եղավ հիվանդացության բռնկում հենց ԲՀԿ պատգամավորների շրջանում: Ըստ Իոաննիսյանի՝ Հանրային խորհուրդը որոշ առաջարկներ է ներկայացրել Կառավարությանը:

«Կարելի է թույլ տալ որոշ տեսակի հավաքները կամ հավաքները թույլ տալ ինչ-որ առումով: Հանրային խորհուրդն առաջարկել է ՀՀ Կառավարությանը՝ մինչև 30 անձի մասնակցությամբ խաղաղ հավաքները թույլ տալ: Ըստ այդ առաջարկի՝ անկախ նրանից՝ դա ենթադրում է հավաքների մասին օրենքով, թե՝ ոչ, պետք է տեղեկացնել ՀՀ Ոստիկանությանը, պարտադիր պահանջ լինի՝ նախապես տեղեկացնել հավաքի մասին, հավաքի մասնակիցները լինեն հեռավորության վրա, կրեն դիմակներ, չխոչընդոտեն ճանապարհային երթևեկությանը, սահմանվի տևողություն՝ երեք ժամ»,- ներկայացրեց Իոաննիսյանը:

Մանրամասները՝ տեսանյութում։