Ի՞նչ է նշանակում ընտանիքում համերաշխության վերականգնում, սա նույնն է, ինչ ասես՝ օրենք՝ ընտանիքում բարձր տրամադրություն առաջացնելու մասին. ԱԺ-ում շարունակվում է ընտանեկան բռնությունը կանխարգելող նախագծի քննարկումը

Ազգային ժողովի պետական-իրավական և մարդու իրավունքների պաշտպանության հարցերի մշտական հանձնաժողովի նիստում շարունակվում է  «Ընտանիքում բռնության կանխարգելման, ընտանիքում բռնության ենթարկված անձանց պաշտպանության և ընտանիքում համերաշխության վերականգնման մասին» օրինագծի քննարկումը: Ելույթով հանդես եկավ «Ծառուկյան» խմբակցության պատգամավոր Գևորգ Պետրոսյանը՝ նախապես հայտարարելով, որ նախագծի հետ կապված ներկայացնում է իր անձնական դիրքորոշումը:

«Նախ՝ օրենքի նախագծի վերնագիրը «Ընտանիքում բռնության կանխարգելման, ընտանիքում բռնության ենթարկված անձանց պաշտպանության և ընտանիքում համերաշխության վերականգնման մասին» մասին օրենք, ես էս օրենքի նախագիծն ընթերցել եմ ինքս ինձ հակադրվելով և չեմ տեսել կանխարգելող դրույթներն, ավելի շատ գրանցված բռնության հետևանքները հարթելու իրավական միջոց է: Ամենազավեշտալին, սակայն, վերնագրի վերջին մասն է, որն անհասկանալի է, թե ինչու ավելացվեց, խոսքը վերաբերում է ընտանիքում համերաշխության վերականգնմանը: Ընկերներ, սա նույնն է, ինչ ասես՝ օրենք՝ ընտանիքում բարձր տրամադրության առաջացնելու մասին, օրենքով պարտադրես, որ վերհիշեն իրենց բարիդրացիական ավանդույթներն ընտանիքում կամ օրենքով պարտադրես, որ այս երեկո տրամադրության անկում չգրանցվի»,- ասաց Գևորգ Պետրոսյանը՝ տարակուսանք հայտնելով, թե ինչպես կարելիէ  օրենքով պարտադրել համերաշխություն:

Պատգամավորն անհամաձայնություն հայտնեց նաև օրինագծի այն դրույթին, որը վերաբերում է ոստիկանների գործողություններին:

«Առ այսօր այդ մասին խոստովանություն է արել նաև ոստիկանապետը, որ քիչ չեն ոստիկանությունում շարժական զանգվածները՝ մարդու կերպարանքով, որ իրենց լիազորություններն, առիթից օգտվելով, չարաշահել են քաղաքացիների նկատմամբ»,- ասաց Գևորգ Պետրոսյանն, ապա հարց ուղղեց, թե օրենքն ընդունելուց հետո ո՞նց են ոստիկանները երկու ամսում արագ վերապատրաստվելու:

Մանրամասներն ավելի ուշ: