18.11.2024 | 11:44
Դժվար է բացառել, որ կուլիսային բանակցություններ չկան ՀՀ-ի և Ադրբեջանի իշխանությունների միջև. Աբրահամյան․ ՏԵՍԱՆՅՈՒԹ
Ոստիկանությունն այս պահին Հայկ Սարգսյանի անվան հետ կապվող White Shorja լողափում է. նրան մանդատից կզրկե՞ն
Հասարակություն
27.07.2020 | 12:03
Երեկ Սևանի White Shorja լողափում տեղի է ունեցել բազմամարդ «փարթի», որին ներկա է եղել ԱԺ «Իմ քայլը» խմբակցության պատգամավոր Հայկ Սարգսյանը: Սոցիալական ցանցերում տարածվել են երեկոյան խնջույքի լուսանկարները, որտեղ բազմաթիվ մարդիկ կան:
Մամուլում հրապարակումներ կան, որ լողափը պատկանում է հենց պատգամավոր Հայկ Սարգսյանին:
Հիշեցնենք, որ կա ՀՀ պարետի որոշում, որի համաձայն՝ բացօթյա միջոցառումներին հինգ հոգուց ավելի մարդ չպետք է մասնակցի: Պարետատնից Factor.am-ին հայտնեցին, որ կազմակերպված «փարթիով» զբաղվում են ոստիկանները:
«Այս պահին Ոստիկանության ծառայողները և տեսչական մարմինների աշխատակիցները գտնվում են տեղանքում, որտեղ միջոցառումը տեղի է ունեցել: Կարծում եմ, որ օրվա ընթացքում աշխատանքների մասին կհայտարարեն»,- ասաց վարչապետի խոսնակ Մանե Գևորգյանը:
Արտակարգ դրության ժամանակ հարսանեկան խնջույք կազմակերպելու համար, հիշեցնենք, աշխատանքից ազատվեցին ԶՈՒ ԳՇ պետ Արտակ Դավթյանը, ինչպես նաև ԱԱԾ տնօրեն Էդուարդ Մարտիրոսյանը և ոստիկանապետ Արման Սարգսյանը՝ մասնակցության համար:
Մանե Գևորգյանից հետաքրրքվեցինք՝ հնարավո՞ր է՝ Հայկ Սարգսյանն էլ պատգամավորական մանդատից զրկվի:
«Ինչ վերաբերվում է նրան՝ արդյո՞ք պատիժ կամ նկատողություն նախատեսվում է, կխնդրեմ խոսեք «Իմ քայլը» խմբակցության հետ, քանի որ նա պատգամավոր է և խմբակցության իրավասության ներքո է գտնվում: Նա օրենսդիր մարմնի ներկայացուցիչ է և վարչապետի կողմից չի նշանակվում»,- ասաց նա:
Փորձեցինք մեկնաբանություն ստանալ Հայկ Սարգսյանից և White Shorja կազմակերպությունից: Մեր հեռախոսազանգերը, սակայն, անպատասխան մնացին։
Նարեկ Կիրակոսյան
