03.04.2026 | 11:24
«Մի տնից 3 ցուցակ եք բերել, 57 հոգի մարդ ա, էսի իմ ու քո մեջ»․ ընտրակաշառքի գործով 62 անձ է ձերբակալվել․ ՏԵՍԱՆՅՈՒԹ
«Մեր երեխաների իրավական պահանջը դատական ատյաններ ներկայացնելու որոշում ենք կայացրել»․ բուհ չընդունված դիմորդների ծնողների ներկայացուցիչ
Հասարակություն
25.07.2020 | 16:58
Հանդիպում ենք ունեցել ԿԳՄՍ փոխնախարար Գրիշա Թամրազյանի հետ և պարզվել է, որ ԿԳՄՍ նախարարությունը չի ցանկանում ընդառաջ գնալ մեր ներկայացրած առաջարկություններին։ Մեր երեխաների իրավական պահանջը դատական ատյաններ ներկայացնելու որոշում ենք կայացրել։ Այս մասին այսօր հրավիրված ասուլիսում նշեց բուհ չընդունված դիմորդների ծնողների ներկայացուցիչ Մասիս Բաբալյանը։
«Մենք շարունակելու ենք մեր ակցիաները և պահանջելու ենք, որ վերականգնվի մեր երեխաների սովորելու իրավունքը, քանի որ որոշ պետական այրերի կողմից այն խլվել է, ոտնահարվել։ Մեր շարժման ընթացքում մի շարք կազմակերպություններ, անհատներ զանգերով, իրենց անձնական մոտեցումներով հիշեցրել են մեզ, որ սատարում են մեր շարժումը և պատրաստ են աջակցել բոլոր այն հարցերում, ինչի կարիքը կունենանք»,- ասաց Բաբալյանը։
Նրա խոսքով՝ նախարարությունից իրենց առաջարկվում է դիմել հեռակա ուսուցման։
«Բոլորին է հայտնի, որ հեռակա ուսուցման համար քննությունները լինում են օգոստոսին և դիմորդներն իրենց գնահատականներով կարող են մասնակցել այդ քննություններին։ Կարծես թե մենք լուսնից ենք իջել, ոչնչից տեղյակ չենք, իսկ իրենք փորձում են լուծում տալ մեր խնդրին՝ առաջարկելով հեռակայի տարբերակը։ Մեր դիմորդների մի մասը տղաներ են, որոնք կա՛մ այս պահին բանակում են, կա՛մ այս քանի օրերին են զորակոչվելու, կա՛մ դեկտեմբերին։ Դուք պատկերացնու՞մ եք՝ իրենց վիճակն ինչ է լինելու։ Բազմաթիվ դիմորդներ 2 տարի չարչարվել են, տանջվել։ Դիմորդի համար իր տարիքի սահմանում կյանքի նպատակ է իր երազած մասնագիտության տեր դառնալը ,և իրենք, ստանալով բարձր գնահատականներ, բնականաբար, այդ պահին համոզված են լինում, որ ընդունված են, բայց անցնում է մի քանի օր և պարզվում է, որ կա՛մ ոչ մի տեղ չեն ընդունվել, կա՛մ վերջին հայտով մի տեղ են ընդունվել»,- նշեց դիմորդների ծնողների ներկայացուցիչը։
Նա տեղեկացրեց, որ երկուշաբթի՝ հուլիսի 27-ին, ԿԳՄՍ նախարարության շենքի մոտ ակցիա են կազմակերպելու և պահանջելու են հանդիպում նախարար Արայիկ Հարությունյանի հետ։
Նելլի Մելքոնյան
