29.04.2026 | 19:00
«Բոլորին դեմ եմ»-ը չի խոսում անիշխանությունից, կձևավորենք պատասխանատու իշխանություն 100 օրով․ Սպարտակ Կյուրեղյան․ ՏԵՍԱՆՅՈՒԹ
Իրանից բողոքի նամակներ կուղարկվեն ՄԱԿ՝ իրանական ինքնաթիռի միջադեպի առնչությամբ
Քաղաքականություն
24.07.2020 | 17:27
ՄԱԿ-ում Իրանի մշտական առաքելությունը բողոքի պաշտոնական նամակներ կուղարկի կազմակերպության գլխավոր քարտուղարին, ինչպես նաև Անվտանգության խորհրդին՝ ներկայացնելով Բեյրութ թռչող ինքնաթիռի միջադեպի մանրամասները։ Այս մասին հայտնում է ԻՌՆԱ-ն։
Ավելի վաղ ՄԱԿ-ում Իրանի մշտական առաքելությունը հաղորդել էր, որ հինգշաբթի Իրանի մշտական ներկայացուցիչ Մաջիդ Թախտ-Ռավանչին հատուկ հեռախոսազրույց է ունեցել ՄԱԿ-ի գլխավոր քարտուղար Անտոնիո Գուտերեշի հետ:
Աղբյուրի փոխանցմամբ՝ հեռախոսազրույցի ընթացքում Թախտ-Ռավանչին նշել է, որ օդանավը վերադարձնելու ճանապարհին ցանկացած միջադեպի համար պատասխանատվությունը Միացյալ Նահանգների վրա է լինելու։
Բացի այդ, Իրանի ԱԳՆ խոսնակ Աբաս Մուսավին հայտարարել է, որ դեպքի մանրամասները հետաքննվում են, և ամբողջական տեղեկատվություն ստանալուց հետո իրավական և քաղաքականության միջոցառումներ կձեռնարկվեն։
ՏԱՍՍ-ի փոխանցմամբ՝ միջադեպին արձագանքել է նաև Պենտագոնը։ ԱՄՆ պաշտպանական գերատեսչությունում նշել են, որ F-15 կործանիչն իրանական ուղևորատար ինքնաթիռից անվտանգ հեռավորության վրա է գտնվել։
Հիշեցնենք՝ հուլիսի 23-ի երեկոյան Սիրիայի երկնքում երկու կործանիչ մոտեցել է իրանական Mahan Air ավիաընկերության ուղևորատար ինքնաթիռին, որն ուղևորվում էր Լիբանան։ Այն հաջողությամբ վայրէջք է կատարել Բեյրութի օդանավակայանում, սակայն վիրավորվել է երեք ուղևոր, ինչպես նաև անձնակազմի մի քանի անդամ: Ըստ իրանական ինքնաթիռի օդաչուի՝ կործանիչներն ամերիկյան էին։
Նելլի Մելքոնյան
