01.07.2026 | 02:54
ԱԱ-2026. Ֆրանսիան խնդիրներ չունեցավ, Մբապեի դուբլը. ՏԵՍԱՆՅՈՒԹ
Ոսկեդարի և միջնադարյան հայ գրականությունը ներառված է ուսումնական ծրագրում․ ԿԳՄՍՆ պարզաբանումը
Հասարակություն
24.07.2020 | 15:41
ԿԳՄՍ նախարարության կողմից ներկայացված Հայոց լեզվի և գրականության չափորոշիչը հանրության շրջանում բուռն քննարկումների առիթ է դարձել։ Որոշ պնդումների համաձայն՝ 7-12 դասարանների «Գրականություն» առարկայից հանվել են Մովսես Խորենացու, Եղիշեի, Կորյունի, Գրիգոր Նարեկացու («Մատյան ողբերգության»), Նաղաշ Հովնաթանի, Ներսես Շնորհալու, Մխիթար Գոշի, Վարդան Այգեկցու, Ղևոնդ Ալիշանի, Ֆրիկի և այլոց ստեղծագործությունները։
Այս առիթով Կրթության, գիտության, մշակույթի և սպորտի նախարարությունը պարզաբանում է տարածել՝ նշելով, որ Ոսկեդարի և միջնադարյան հայ գրականությունը ուսումնական ծրագրում ներառված է։
«Մասնավորապես՝ սկսած 5-րդ դասարանից՝ աշակերտները կուսումնասիրեն պատմիչներ Մովսես Խորենացու, Ագաթանգեղոսի, Փավստոս Բուզանդի, Եղիշեի, Ղազար Փարպեցու, ինչպես նաև առակագիրների գործերը: Ծրագրում ներառված են նաև միջնադարյան հեղինակներ Գրիգոր Նարեկացին, Ներսես Շնորհալին, Նահապետ Քուչակը, Սայաթ-Նովան։
Խումբը շարունակում է աշխատել և լրամշակել ծրագիրը՝ քննարկելով հանրության բոլոր առաջարկությունները և դիտարկումները: Գրականության ամբողջական ցանկը կներկայացվի հանրային քննարկումների արդյունքում լրամշակումներից հետո»,- նշվում է նախարարության հաղորդագրությունում։
Պարզաբանման մեջ նաև տեղադրված է 7-12-րդ դասարանների գրականության ցանկի աշխատանքային՝ լրամշակվող տարբերակը։
