Պետք է հասկանալ՝ ինչ ձախողումներ ենք ունեցել․ սահմանադրական կարգավորումները էական դեր ունեն․ Եղիշե Կիրակոսյան․ ՏԵՍԱՆՅՈՒԹ

Սահմանադրության փոփոխության առանցքային պատճառը լեգիտիմ Սահմանադրություն ունենալու գաղափարն է։ Այս մասին այսօր «Գործընկերություն հանուն բաց հասարակության» նախաձեռնության կազմակերպած սահմանադրական բարեփոխումների վերաբերյալ առցանց քննարկման ժամանակ ասաց ահմանադրական բարեփոխումների մասնագիտական հանձնաժողովի նախագահ Եղիշե Կիրակոսյանը։

«Մենք հենց այդ օրգանական՝ քաղաքացի-պետություն կապի վերականգնումից ենք սկսում։ Եթե ունենանք իրապես ժողովրդավարական ճանապարհով ձևավորված և ընդունված սահմանադրություն, կարծում եմ՝ դա այդ խնդիրների հիմքն է։ Մնացած բոլոր գաղափարները՝ իշխանությունների հավասարակշռության գաղափարը, զավթման կանխման երաշխիքներ ունենալը և շատ հանգամանքներ, սկսվում են հենց այստեղից։ Որովհետև եթե այս առաջին կետում մենք ունենում ենք ձախողում, անիմաստ է խոսել մնացած ամեն ինչի մասին»,- նշեց Կիրակոսյանը։

Վերջինս նշեց, որ մինչև մեր խնդիրները չկարողանանք ճիշտ ախտորոշել, չենք կարողանալու այլ սահմանադրական բարեփոխումների այլ երկրների փորձը ճիշտ տեղայնացնել․ «Վստահ պետք է նայենք հետ և հասկանանք՝ ինչի միջով ենք անցել, ինչ ձախողումներ ենք ունեցել և ինչ կարգավորումներ են, նաև սահմանադրական ձևակերպումները, կարգավորումները էական դեր ունեն շատ հարցեր կանխելու, ճիշտ կարգավորելու, պետական իշխանության կառավարման համակարգի մոդելի տրամաբանությունը հասկանալու համար»,- նշեց Կիրակոսյանը։

Նա, դիմելով քաղհասարակության ներկայացուցիչներին, ովքեր մասնակցում էին քննարկմանը, ընդգծեց նաև, որ այս հարցերի բարձրաձայնումը շատ կարևոր է և ընդհանուր հայեցակարգը ձևավորվելու է քննարկումների, առաջարկների արդյունքում։

Մանրամասները՝ տեսանյութում։