05.04.2026 | 21:21
Բախվել են VAZ և KIA մակնիշների ավտոմեքենաները․ կան տուժածներ և զոհ
ԱՄՆ կոնգրեսականը կոչ է արել վերանայել Ադրբեջանին ու Հայաստանին տրվող օգնության չափերը
Քաղաքականություն
23.07.2020 | 14:32
ԱՄՆ կոնգրեսական Ջիմ Կոստան անդրադարձել է վերջին շրջանում հայ-ադրբեջանական սահմանի լարվածությանը՝ կոչ անելով վերանայել Ադրբեջանին տրվող աջակցությունը, ինչպես նաև ավելացնել Հայաստանին տրվող օգնության չափը։ Կոնգրեսականի ելույթը հրապարակել է Ամերիկայի Հայ դատի հանձնախումբը։
Ջիմ Կոստան, մասնավորապես, ասել է․ «Հուլիսի 12-ից սկսած՝ ադրբեջանցի զինվորները մոտեցել են հայկական սահմանին և Տավուշի մարզում կրակ բացել քաղաքացիների ուղղությամբ: Դրանից հետո հակամարտությունը, ցավոք, սրվել է: Ադրբեջանական ուժերը հարվածել են հայկական դպրոցներին, գործարաններին․ այն գործարանին, որն արտադրում է համավարակի ընթացքում այդքան անհրաժեշտ անձնական պաշտպանիչ միջոցներ։
Ադրբեջանը պետք է պատասխանատվության ենթարկվի։ Հիմա, առավել քան երբևէ, կենսական կարևորություն ունի Արցախի հետ խաղաղության հաստատման ուղղությամբ աշխատելը:
Անմիջապես պետք է վերանայվի անվտանգության հարցում ԱՄՆ-ի կողմից Ադրբեջանին տրվող աջակցությունը, քանի որ Ադրբեջանի գործողությունները համապատասխան չեն։ Ինչպես նաև պետք է ավելացվի Հայաստանին տրվող օգնությունը՝ Ադրբեջանի այս ագրեսիային դիմակայելու համար: Երեկվա հատկացումների օրինագծում 20 միլիոն դոլար է ավելացվել Հայաստանին տրվող գումարին։
Գործընկերներիս հորդորում եմ աջակցել օրինագծին և անհապաղ քայլեր ձեռնարկելու կոչ անել ՝ դատապարտելով Ադրբեջանի խայտառակ գործողությունները»։
