«Շատ լկտի տեքստ էր, դժվար այդ պերսոնաժները «ինքնասպան» լինեին». Մարգարիտա Սիմոնյանի խոստացված ցուցակի հետքերով․ ՏԵՍԱՆՅՈՒԹ

Ռուսական քարոզչամեքենայի՝ Russia Today հեռուստաալիքի և «Սպուտնիկ» գործակալության գլխավոր խմբագիր, հայազգի Մարգարիտա Սիմոնյանն իր վերջին ֆեյսբուքյան գրառումը, որտեղ պնդում էր, որ Ռուսաստանը բարոյական իրավունք ունի թքելու Հայաստանի վրա, շարունակեց պնդմամբ, թե այն հրապարակելուց հետո իրեն են դիմել բազմաթիվ հայազգի հայտնի գործիչներ՝ ասելով, թե միանում են իր գրառմանը, և խոստացավ երկուշաբթի հրապարակել նրանց ցուցակը։ Այսօր չորեքշաբթի է, սակայն Սիմոնյանն այդպես էլ չի հրապարակել խոստացված ցուցակը, միայն երեկ ֆեյսբուքում գրել է, թե քանի որ գրառումն այնքան աղմուկ է բարձրացրել, որ ստորագրել ցանկացողներն անընդհատ զանգում և գրում են իրեն, ինքն անուններ կտա մի փոքր ուշ, երբ նրանք կդադարեն զանգել և գրել:

Քաղաքագետ Ստյոպա Սաֆարյանն ավելի քան վստահ է, որ Մարգարիտա Սիմոնյանը չի կարողացել որևէ ստորագրություն հավաքել: Ըստ նրա՝ Սիմոնյանի գրառման տակ ոչ ոք ստորագրություն չի դնի, քանի որ դա հավասարազոր կլինի ինքնասպանության:

Իսկ ահա իրավապաշտպան Նինա Կարապետյանցը տալիս է հավանական անուններ, թե ովքեր կարող են միանալ Սիմոնյանի գրառմանը:

Մարգարիտա Սիմոնյանի գրառումը Երևանում որոշ շրջանակների կողմից ընկալվեց պաշտոնական Մոսկվայի և անձամբ ՌԴ նախագահ Վլադիմիր Պուտինի դիրքորոշում: Սա հիմնավորվում էր նրանով, որ Մարգարիտա Սիմոնյանը պետական միջոցներով սնվող և Ռուսաստանի սահմաններից դուրս ռուսական քարոզչություն իրականացնող «Russia Today» հեռուստաալիքի գլխավոր խմբագիրն է:

Ստյոպա Սաֆարյանը, սակայն, աղմկահարույց գրառումից հետո Մարգարիտա Սիմոնյանի քայլերը վերլուծելով, ասում է՝ Կրեմլի մակարդակով նրան դիտողություն են արել:

Իրավապաշտպան Նինա Կարապետյանցն էլ Մարգարիտա Սիմոնյանի գրառման վերաբերյալ հոդվածը ՀԱՊԿ-ի համացանցային էջերում հրապարակելը որակում է մեղսունակության սահմանների հատում: Նա, միաժամանակ, նշում է, որ Մարգարիտա Սիմոնյանը լուրջ խնդիրներ ունի ռուսական վերնախավի հետ, ուստի հաճոյանալու համար նման գրառումներ է կատարում:

Հուլիսի 18-ի գրառմամբ Մարգարիտա Սիմոնյանը Հայաստանի իշխանություններին մեղադրել էր նաև ազգությամբ հայ ռուսաստանցի գործարարներին Հայաստանից վռնդելու համար: Ստյոպա Սաֆարյանը չի բացառում, որ Մարգարիտա Սիմոնյանն ակնարկում է այն անձանց, որոնք հեղափոխությունից հետո հանգրվանել են Ռուսաստանում՝ խուսափելով արդարադատությունից:

Հիշեցնենք՝ այս պահին հետախուզման մեջ գտնվողներից Ռուսաստանում են 2008 թվականի Մարտի 1-ի արյունալի իրադարձությունների ժամանակ Հայաստանի պաշտպանության նախարարի պաշտոնը զբաղեցրած, սահմանադրական կարգի տապալման փորձի մեջ մեղադրվող Միքայել Հարությունյանը, Մարտի 1-ի գործով քննչական խմբի նախկին ղեկավար Վահագն Հարությունյանը, նախկին գլխավոր դատախազ Գևորգ Կոստանյանը, ԴԱՀԿ նախկին պետ, օֆշորային բիզնեսմեն Միհրան Պողոսյանը։ Ոչ պաշտոնական տեղեկություններ կան նաև բնապահպանության նախկին նախարար Արամ Հարությունյանի, ինչպես նաև Երևանի նախկին քաղաքապետ Գագիկ Բեգլարյանի՝ այնտեղ գտնվելու մասին:

Այս ցանկից առնվազն Միհրան Պողոսյանը, Արամ Հարությունյանը և Գագիկ Բեգլարյանը, թեև պետական պաշտոնյաներ էին, բայց ահռելի կարողություն էին դիզել և տարատեսակ բիզնեսների տեր դարձել։ Ստյոպա Սաֆարյանը չի բացառում, որ Մարգարիտա Սիմոնյանը հենց նրանց շահերը սպասարկելու համար է նման գրառում կատարել:

Նինա Կարապետյանցն իր հերթին նշում է, որ նրանց վերադարձին բոլորն են սպասում, քանի որ այդ անձինք պետք է պատասխան տան արդարադատության առաջ:

Ի դեպ, Մարգարիտա Սիմոնյանի՝ շատերի զայրույթն առաջացրած գրառումից մի քանի օր անց միայն նրա ամուսինը՝ հայազգի կինոռեժիսոր Տիգրան Քեոսայանը հայտարարեց, որ ստորագրում է կնոջ գրած յուրաքանչյուր բառի տակ:

Մանրամասները՝ տեսանյութում։

Նարեկ Կիրակոսյան