Ասադի կուսակցությունը հաղթել է Սիրիայի խորհրդարանական ընտրություններում

Հուլիսի 19-ի Սիրիայում անցկացված ընտրությունների արդյունքում խորհրդարանում իշխող կոալիցիան կորցրել է 23 տեղ, սակայն, ամեն դեպքում, պահպանել է մեծամասնության դիրքերը։ Ընտրություններին մասնակցել է ընտրելու իրավունք ունեցող քաղաքացիների 33%-ը, գրում է ՌԲԿ-ն։

«Ազգային առաջադիմական ճակատ» կոալիցիան, որը գլխավորում է երկրի գործող ղեկավար Բաշար Ասադի «Բաաս» կուսակցությունը, ստացել է խորհրդարանի 250 տեղերից 177-ը:

Ի տարբերություն 2016 թվականի ընտրությունների, երբ երկրի տարածքի կեսից ավելին չէր վերահսկվում կառավարության կողմից, այս տարի քվեարկությունը կազմակերպվել է Սիրիայի 70%-ը կազմող հատվածում։ Բացվել են ավելի քան 7 հազար ընտրատեղամասեր։ Արտերկրում գտնվող սիրիացիները, ներառյալ փախստականները, չեն կարողացել մասնակցել ընտրություններին:

Ընդդիմադիրները կարծում են, որ ընտրություններն ընդհանրապես չէին կարող անցկացվել՝ մինչև ՄԱԿ-ի հովանու ներքո նոր Սահմանադրության ընդունումը, որը պետք է մշակեր Ժնևում գտնվող Սահմանադրական հանձնաժողովը, սակայն դրա աշխատանքները դադարեցված են: Սիրիայի Սահմանադրությունն արդեն փոխվել է ռազմական հակամարտության բռնկումից հետո, բայց առանց ընդդիմության և միջազգային հանրության մասնակցության։ 2012թ․ փոփոխությամբ ընդլայնվեց խորհրդարանի՝ գործադիր իշխանությանը վերահսկելու իրավունքը:

Հիշեցնենք, որ քվեարկությունը պետք է տեղի ունենար ապրիլի 13-ին, սակայն կորոնավիրուսի պատճառով հետաձգվեց մինչև մայիս։ Մայիսին էլ նոր օր նշանակվեց՝ հուլիսի 19-ը, չնայած այն փաստին, որ համաճարակի հետ կապված իրավիճակը չի բարելավվել:

Հավելենք նաև, որ Սիրիայի խորհրդարանում հայազգի երեք պատգամավոր կլինի։