12.10.2026 | 16:53
«Ընտրությունն իրականացրել է ՄԱԿ-ը»․ COP17-ի գնումների վերաբերյալ ընդդիմության մեղադրանքներին արձագանքել է ՇՄ նախարարությունը
Եվրամիության արտակարգ գագաթաժողովն արդեն 4-րդ օրն է՝ չի ավարտվում
Քաղաքականություն
20.07.2020 | 19:51
Եվրամիության արտակարգ գագաթաժողովն արդեն չորրորդ օրն է՝ չի ավարտվում, ինչը պայմանավորված է SARS-CoV-2 կորոնավիրուսից տուժած երկրներին տրամադրվելիք օգնության փաթեթի շուրջ տարաձայնություններով։ Այս մասին տեղեկացնում է DW-ի ռուսական ծառայությունը։
Բանակցությունները նախապես պլանավորված էր ավարտել երկու օրում: Նախորդ օրը Բրյուսելում քննարկումը շարունակվել է մինչև ուշ գիշեր: Ավստրիան, Դանիան, Նիդերլանդները, Շվեդիան և Ֆինլանդիան դեմ են արտահայտվել Բրյուսելի ծրագրերին ՝ դրամաշնորհի հիման վրա համաճարակից ամենաշատը տուժած երկրներին 500 միլիարդ եվրո հատկացնելու վերաբերյալ։
Այս դիրքորոշումը դժգոհություն է առաջացրել Ֆրանսիայի նախագահ Էմանուել Մակրոնի կողմից, ով նման գործողությունները անվանել է «եսասիրական»: Նա նշել է, որ ավելի շուտ պատրաստ է լքել գագաթաժողովը, քան ստորագրել «վատ համաձայնագիրը»:
Իր հերթին, Եվրոպական խորհրդի նախագահ Շառլ Միշելն առաջարկել է դրամաշնորհների մասնաբաժինը նվազեցնել մինչև 400 միլիարդ եվրոյի:
Մինչ գագաթաժողովի չորրորդ օրվա մեկնարկը՝ Նիդերլանդների վարչապետ Մարկ Ռութը հայտարարել է բանակցություններում առաջընթացի մասին: Նրա խոսքով՝ Եվրոպական խորհրդի ղեկավարը մշակում է նոր առաջարկ՝ կապված համաճարակի հետևանքով տնտեսական ճգնաժամի դեմ պայքարի հետ:
Համաձայնության հասնելու ևս մեկ խոչընդոտ կա՝ Հունգարիայի և Լեհաստանի դիրքորոշումը, որոնք համաձայն չեն վճարումները կապել օրենքի գերակայության պահպանման հետ: Բացի այդ, գագաթաժողովի մասնակիցները քննարկում են Եվրամիության բյուջեն 2021-2027 թվականների համար: Այն կկազմի 1․074 տրիլիոն եվրո՝ 13 միլիարդով պակաս, քան Եվրամիության ղեկավարը առաջարկել էր փետրվարին ԵՄ գագաթաժողովի ժամանակ: Եվրահանձնաժողովը մայիսյան իր առաջարկով նախատեսել է 1․1 տրիլիոն եվրո բյուջե։
