Ադրբեջանցիներն ասում էին՝ Երևանում չայ են խմելու, բայց երևի մենք Նախիջևանում իրենց շաքար տանք․ Սասուն Միքայելյան. ՏԵՍԱՆՅՈՒԹ

Factor.am-ի հարցազրույցը «Երկրապահ» կամավորականների միության վարչության նախագահ, Ազգային ժողովի «Իմ քայլը» խմբակցության պատգամավոր Սասուն Միքայելյանի հետ

-Պարոն Միքայելյան, նախ կխնդրեմ նշեք, թե ինչպե՞ս եք գնահատում այս օրերին մեր Զինված ուժերի աշխատանքը և ի՞նչ եք կարծում՝ սահմանին առկա լարվածությունն արդյոք կարո՞ղ է վերաճել լայնածավալ ռազմական գործողությունների։

-Արդեն 5-րդ օրն է, որ կիրառվում են սադրիչ գործողություններ Տավուշի ուղղությամբ, բայց դրանք կասեցվում են մեր բանակի մարտունակության, գրագետ և պատասխանատու քայլերի շնորհիվ։ Արդեն պարզ է, որ Ադրբեջանն էլ ուրիշ հնարավորություն չունի, որ գա բանակցության և այս ամեն ինչը խաղաղվի։ Իսկ հետագա լայնածավալ հարձակումները, ինձ թվում է, հնարավոր չեն, որովհետև թե՛ Ապրիլյան քառօրյայի ժամանակ, թե՛ հիմա, թե՛ ընդհանուր սադրիչ գործողությունների ժամանակ կամ դիվերսիոն հարձակումների ժամանակ իրենք միշտ պատասխան են ստացել և լռել։ Սա հերթական փորձն էր, որը կանխվեց մեր Զինված ուժերի կողմից։

-Այս օրերին մենք տեսնում ենք, որ Ադրբեջանում, մասնավորապես՝ Բաքվում, ցույցեր են տեղի ունենում, որոնց ժամանակ մինչև անգամ տեռորիստական կոչեր են հնչում՝ կապված Հայաստանի և Արցախի հետ։ Ադրբեջանն այս օրերին սպառնում է Մեծամորի ատոմակայանը խոցել։ Ի՞նչ եք կարծում՝ իրենք կգնա՞ն այդ քայլին և ի պատասխան Հայաստանի քայլերն ինչպիսի՞ն պետք է լինեն։

-Հնարավոր չի՝ իրենք նման քայլի գնան․ ընդամենն անճարությունից ելնելով՝ ինչ-որ բաներ են ասում, հաթաթա են տալիս։ Թող իրենք հասկանան, որ կա ատոմակայանի գերեզմանոց և Աստված մի արասցե, եթե գնան նման քայլի, մենք ուրիշ քայլերի կդիմենք։

-Բայց փաստորեն, տեսնում ենք, որ նման հայտարարություն է Ադրբեջանի կողմից հնչում, բացահայտ սպառնալիք է․․․

-Անճարության ոռնոց է դա։ Բազմիցս բոլորս ականատես ենք եղել, որ իրենք փորձել են դիվերսիոն հարձակումներ անել, բայց հակահարված են ստացել։ Կարևորն այն է, որ մենք ազգովի լինենք համախմբված․ Սփյուռք, Հայաստան, Արցախ և պատրաստ լինենք պատերազմի։

-Պարոն Միքայելյան, իրենք մշտապես հայտարարում էին․ պետք է գնանք, Երևանում թեյ խմենք, պետք է գրավենք Արցախը, մերն է Արցախը, մեր պատմական հայրենիքի մի մասն է։ Ինչի՞ համար են նման հայտարարություններ արվում։

-Իրենք ասում են՝ էս կանենք, էն կանենք։ Բայց մենք, փաստացի, մեր գործողություններն արել ենք 90-ական թվերին՝ չունենալով բանակ։ Փառք ու պատիվ մեր տղերքին, ԵԿՄ-ին, կամավորականներին, որ չունենալով բանակ, սպարապետ Վազգեն Սարգսյանը կարողացավ համախմբել մեզ բոլորիս։ Մենք ազատագրեցինք Արցախ աշխարհը։ Շատերը չեն տեսել, թե ինչ կրակ էր թափվում Արցախի վրա։

-Երեկ կրակոցներ են հնչել նաև Նախիջևանի ուղղությամբ։ Եվ գիտենք, որ Թուրքիան բացահայտ աջակցություն էր հայտնել Ադրբեջանին՝ այս իրավիճակում։ Նախիջևանի մասով կարո՞ղ են լինել սպառնալիքներ և այս պարագայում մեր քայլերն ինչպիսի՞ն պետք է լինեն։

-Դե իրենք ասում են՝ մենք պիտի Երևանում չայ խմենք, թե սուրճ։ Բայց մենք երևի Նախիջևանում իրենց շաքար տանք՝ չայով սուրճ խմեն, երբ իրենք արդեն հանձնած լինեն Նախիջևանը։ Կարևորը, որ մենք խելոք, համախմբված լինենք։ Դուք գիտեք՝ այս վերջին ժամանակաշրջանում՝ նոր իշխանության օրոք, մեր բանակն ուրիշ կարգի բանակ է դարձել։

Մանրամասները՝ տեսանյութում

Մերի Մարտիրոսյան