12.01.2025 | 00:54
Կիևյան փողոցի տներից մեկում հրդեհ է բռնկվել. դեպքի վայր է մեկնել չորս մարտական հաշվարկ
21-ամյա երիտասարդը դանակահարվել է՝ վիճաբանությանը միջամտելու ժամանակ. հարուցվել է քրեական գործ
Հասարակություն
10.07.2020 | 18:18
ՀՀ քննչական կոմիտեից տեղեկացնում են, որ Շիրակի մարզային քննչական վարչությունում քննություն է տարվում՝ Արթիկ քաղաքի բնակչի կողմից 21-ամյա երիտասարդին դանակահարելու դեպքի բոլոր հանգամանքները պարզելու ուղղությամբ:
«2020 թվականի հուլիսի 5-ին՝ ժամը 17:30-ի սահմաններում, Արթիկի բնակիչը, ով ոստիկանության ծառայող է, ահազանգել, այնուհետև՝ զեկուցագիր է ներկայացրել այն մասին, որ իր հետ նույն փողոցում բնակվող հարևանի տան բակում տեղի ունեցած վիճաբանության ժամանակ դանակահարվել է երիտասարդ:
Դեպքի առթիվ նյութերի նախապատրաստման ընթացքում պարզվել են միջադեպի մի շարք հանգամանքներ, այդ թվում՝ շարժառիթը:
Նախնական տվյալներով՝ 2020 թվականի հուլիսի 5-ին՝ ժամը 17:15-ի սահմաններում, Արթիկ քաղաքի 48-ամյա բնակիչը գնացել է իր կնոջ քրոջ տուն, կենցաղային հարցերի շուրջ վիճաբանել քենակալի հետ և հայհոյել, որի ժամանակ դանակով հարվածել է վիճաբանությունը հանդարտեցնել փորձող կնոջ քրոջ 21-ամյա որդու կրծքավանդակին և հեռացել դեպքի վայրից:
Ճանապարհին 48-ամյա տղամարդը հանդիպել է դեպքի վայր ժամանող ոստիկանության ծառայողներին և հայտնել, որ ինքն է դանակով հարվածել կնոջ քրոջ որդուն, որից հետո բերման է ենթարկվել և բացատրություն տվել դեպքի շուրջ:
Երիտասարդին հասցված մարմնական վնասվածքի բնույթը, ծանրության աստիճանը, առաջացման մեխանիզմը և մի շարք այլ հանգամանքներ պարզելու նպատակով, նյութերի նախապատրաստման ընթացքում, նշանակվել է դատաբժշկական փորձաքննություն:
Համաձայն փորձագետի եզրակացության՝ ստացած մարմնական վնասվածքը` կրծքավանդակի ձախ կեսի կտրած-ծակած, ձախակողմյան հեմոպնևմոթորաքսով թափանցող վերքի ձևով, հասցվել է սուր ծակող-կտրող գործիքով, և առաջացրել է կյանքին վտանգ սպառնացող առողջությանը ծանր վնաս:
Դեպքի առթիվ ՀՀ քրեական օրենսգրքի 112-րդ հոդվածի (դիտավորությամբ առողջությանը ծանր վնաս պատճառելը) 1-ին մասի հատկանիշներով հարուցվել է քրեական գործ, որը նախաքննություն կատարելու համար ուղարկվել է ՀՀ քննչական կոմիտեի Շիրակի մարզային քննչական վարչություն և ընդունվել վարույթ:
Կատարվում է նախաքննություն:
Միջոցներ են ձեռնարկվում՝ դեպքի հանգամանքների բազմակողմանի, օբյեկտիվ և լրիվ հետազոտումն ապահովելու ուղղությամբ»,- ասված է հաղորդագրությունում:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
