Հայկ Եսայանը գաղտնի է պահում, թե որքան է վճարել «Բիլայնը» գնելու համար. ՏԵՍԱՆՅՈՒԹ

Ես ոչ մի խնդիր չեմ տեսնում և իրենց կարող եմ հանգստացնել, որ ոչ մի զանգվածային ազատումներ չեն լինելու, իրենց ներուժը մեզ անհրաժեշտ է։ Այս մասին Factor.am-ին ասաց «Թիմ» ՍՊԸ-ի հիմնադիր Հայկ Եսայանը՝ անդրադառնալով «Բիլայնի» աշխատակիցների մտահոգություններին, թե ընկերությունը գնելուց հետո իրենց ազատելու են աշխատանքից:

«Մենք ընդամենն ասում ենք, որ մարդկային ռեսուրսի կարիք ունենք, և վստահ ենք, որ միասին ավելի լավ ուժով կարող ենք զարգացնել, քանի որ այս ոլորտում 20 տարուց ավելի եմ, մեր վերջին 5-10 տարիների պրոբլեմը հենց մարդկային ռեսուրսի ներգրավումն է եղել։ Այսօր մենք ունենք հնարավորություն այդ մարդկային ռեսուրսը ունենալու և այդ ռեսուրդի վրա ձևավորելու նոր զարգացման ուղի և ունենալ ավելի լավ ծառայություն»,- ասաց Եսայանը։

Հարցին՝ որքա՞ն է գործարքի արժեքը, Եսայանն ասաց, որ դա գաղտնիք է։ Հարցին՝ ի՞նչ երաշխիքներ է ինքը ներկայացնելու «Բիլայնի» աշխատակիցներին և արդյոք հանդիպելո՞ւ է նրանց հետ, Եսայանն ասաց. «Ես երաշխիքը ներկայացրի, որ մինիմում 6 ամիս ոչ մի քայլ չենք անելու։ Աշխատակիցների հետ հանդիպում լինելու է, ուղղակի ես հիմա նման իրավասություն չունեմ՝ այդ աշխատակիցների հետ շփվելու, որովհետև դե յուրե մենք ոչ մի կապ չունենք «Բիլայն» ընկերության հետ»։

Նշենք, որ ՏՄՊՊՀ-ն որոշել է «ՎԵՈՆ Արմենիա» փակ բաժնետիրական և «Թիմ» սահմանափակ պատասխանատվությամբ ընկերությունների համակենտրոնացումը` «Թիմ» սահմանափակ պատասխանատվությամբ ընկերության կողմից «ՎԵՈՆ Արմենիա» փակ բաժնետիրական ընկերության 100 տոկոս փայաբաժնի ձեռքբերման միջոցով: Սահմանվել է, որ «ԹԻՄ» սահմանափակ պատասխանատվությամբ ընկերությունը պարտավորվում է համակենտրոնացումը գործողության մեջ դնելուց հետո առնվազն վեց ամսվա ընթացքում աշխատակիցների զանգվածային ազատումներ (աշխատողների ընդհանուր թվի ավելի քան 10 տոկոսը) չիրականացնել»:

Հիշեցնենք, որ «Թիմ» ՍՊԸ հիմնադիրները Եսայան եղբայրներն են, որոնք բաժնետերերի հետ ունեցած խնդիրներից հետո հեռացել էին Ucom ընկերությունից։

Նշենք, որ ՀԾԿՀ-ի դիմաց «Բիլայն»-ի աշխատակիցները բողոքի ակցիա էին իրականացնում։

Մանրամասները՝ տեսանյութում:

Նարեկ Կիրակոսյան