Հակաճգնաժամային առաջին միջոցառումը փոփոխության ենթարկվեց, ըստ վարչապետի ներդրումներն են խթանում. ՏԵՍԱՆՅՈՒԹ

«Մենք փոփոխություններ կատարեցինք մեր հակաճգնաժամային առաջին միջոցառման մեջ, այսինքն՝ տրանսֆորմացիայի ենթարկեցինք այն, որի նպատակը ներդրումների խթանումն էր»,- կառավարության այսօրվա նիստին հայտարարեց վարչապետ Նիկոլ Փաշինյանը:

Նա, սակայն, ընդգծեց, թե տպավորություն ունի, որ գործարար համայնքը բավարար չափով իրազեկված չէ այդ մասին:

Փոխվարչապետ Մհեր Գրիգորյանն այս հարցի վերաբերյալ մանրամասներ ներկայացրեց։

«Հունիսի 20-ից ուժի մեջ է մտել մեկ կանոն, որը, կարծում եմ, շատ կարևոր ռազմավարական կանոն է: Մինչ օրս մեր սուբսիդավորման գործիքն աշխատում էր հետևյալ տրամաբանությամբ` մինչև 250 մլն դրամ վարկային ռեսուրսները սուբսիդավորվում էր մինչև 1 տարի ժամկետով: Մենք ուժի մեջ ենք մտցրել հետևյալ սահմանումը, որ եթե ձեռնարկությունը, տնտեսվարողը 50 մլն դրամի չափով կանոնադրական կապիտալի համալրում է իրականացրել կամ կիրականացնի 2020 թվականի ընթացքում, ապա նա հնարավորություն է ստանում հավելյալ սուբսիդավորվել 400 մլն դրամի չափով և 36 ամիս ժամկետով, որը շատ էական է: Այն էական արտոնյալ հնարավորություն է: Եթե համալրումն իրականացվել է 100 մլն դրամի չափով, ապա տնտեսվարողը հնարավորություն ունի ստանալ 500 մլն դրամին համարժեք սուբսիդավորում` 48 ամսվա համար: Սա լրջագույն խթան է: Եթե պարզ հաշվարկ անենք տնտեսվարողի տարեկան խնայողությունը 500 մլն դրամի սուբսիդիայի մասով, ապա դա, ըստ էության, իր 1-2 տարվա շահն է, որը ինքը կարող է ներդնել կանոնադրական կապիտալում», – ասաց Գրիգորյանը:

Նա նշեց, թե այս պահի դրությամբ այս կանոնով մեկ հայտ բավարարվել է, ևս երկու հայտ քննարկման փուլում է:

Անդրադառնալով հարկային բարեփոխումներին՝ փոխվարչապետն ասաց, որ տնտեսության մեջ շուրջ 64 մլդ դրամի շրջանառություն է մնացել:

Մանրամասները՝ տեսանյութում: