10.09.2026 | 11:35
Թրամփը հայտարարել է, որ Իրանի հետ պատերազմը կավարտվի ԱՄՆ միջանկյալ «ընտրություններից անմիջապես հետո»
2013 թ-ի «կամ-կամ»-ը Ռուսաստանի հետ համաձայնությամբ դարձել է «կամ և մի քիչ». Ավետիք Իշխանյանը՝ Հայաստան-ԵՄ համաձայնագրի մասին
Քաղաքականություն
24.11.2017 | 14:59
Հայաստանի Հելսինկյան կոմիտեի նախագահ Ավետիք Իշխանյանի կարծիքով՝ Ռուսաստանը հավանաբար գիտակցել է, որ չի կարող Հայաստանին ֆինանսական աջակցություն ապահովել, ուստի համաձայնության են եկել՝ Հայաստան-ԵՄ Համապարփակ և ընդլայնված գործընկերության մասին համաձայնագրի շուրջ:
«Եթե 2013 թվականին հարցը դրված է եղել «կամ-կամ», ապա այժմ Ռուսաստանի հետ համաձայնություն է եղել «կամ և մի քիչ», այսինքն՝ «կամ»-ը ԵՏՄ-ն է, «մի քիչ»-ը՝ Եվրամիությունը»,- Factor.am-ի հետ զրույցում ասաց իրավապաշտպանը:
Ավետիք Իշխանյանը նշեց՝ միամտություն կլինի կարծել, որ այս համաձայնագրի ստորագրումից հետո Հայաստանը կծաղկի եվրոպական որևէ երկրի պես:
«Հայաստանը բազմաթիվ պարտավորություններ ունի, որոնք այս տարիների ընթացքում չեն կատարվել: Արդյոք այս համաձայնագրով իրականություն կդառնա դատական համակարգի անկախության հարցը, իհարկե՛, ոչ»,- շեշտեց իրավապաշտպանը:
Ավետիք Իշխանյանն, ի դեպ, համոզված է, որ Հայաստան-ԵՄ համաձայնագրի դրույթների իրականացման հարցում մեծ դեր ունի Հայաստանի հասարակությունը:
«Հայաստանում բարեփոխումների հարցում հիմնական դերը հասարակությանն է, իսկ եթե հասարակությունը համակերպված է, ապա ցանկացած եվրոպական երկիր չի կարող մեր փոխարեն իրավիճակ փոխել: Նրանք կարող են ընդամենը աջակցել այն ուժին, որը կարող է բարեփոխումներ իրականացնել»,- հավելեց Հայաստանի Հելսինկյան կոմիտեի նախագահը:
Հարցազրույցն ամբողջությամբ՝ տեսանյութում:
Շողիկ Գալստյան
