03.07.2026 | 15:47
Ընտրակաշառքի համար պատիժները խստացվեցին․ ԱԺ-ն ընդունեց նախագիծը
Այս համաձայնագիրն ապացուցեց՝ Հայաստանը կարող է ինքնուրույն արտաքին քաղաքականություն վարել. Մարգարիտ Եսայան
Քաղաքականություն
24.11.2017 | 14:00
Ազգային ժողովի Հանրապետական խմբակցության պատգամավոր Մարգարիտ Եսայանի խոսքով՝ Եվրամիության անդամ երկրների հետ Հայաստանի համագործակցությունը մշտապես եղել է Հայաստանի արտաքին քաղաքականության հիմնական ուղղություններից մեկը:
«Այնպես չէ, որ մենք հենց հիմա եկանք այդ գիտակցության: Հայաստանի արտաքին քաղաքականության ուղեգծում եղել է Եվրոպական երկրների հետ համագործակցությունը: Ի դեպ, այդ համագործակցությունը դե ֆակտո եղել է, պարզապես այսօր արդեն կարող ենք ասել, որ վերջապես համաձայնագիրը ստորագրվում է»,- Factor.am-ի հետ զրույցում նշեց ՀՀԿ խմբակցության պատգամավորը:
Մարգարիտ Եսայանի պնդմամբ՝ որևէ արգելք չի եղել, որը կարող էր խոչընդոտել համաձայնագրի ստորագրմանը:
«Ընդ որում՝ չի էլ կարող որևէ պետություն մեզ արգելել: Մենք մշտապես մոռանում ենք , որ Հայաստանն ազատ և ինքնիշխան պետություն է, և ինքն է իր արտաքին քաղաքական ուղեգիծը գծում՝ ելնելով սեփական շահերից: Դա եղել է և՛ ԵՏՄ-ի դեպքում, և՛ այսօր այս համաձայնագրի ստորագրումը բխում է բացառապես Հայաստանի շահերից»,- շարունակեց պատգամավորը:
Հիշեցնենք՝ Բրյուսելում այժմ ընթանում է Արևելյան գործընկերության գագաթնաժողովը, որի ընթացքում ակնկալվում է, որ կստորագրվի Հայաստան-Եմ Համապարփակ և ընդլայնված գործընկերության համաձայնագիր:
Հարցաազրույցն ամբողջությամբ՝ տեսանյութում:
Շողիկ Գալստյան
