17.11.2024 | 23:31
Պաշտոնանկություններ կառավարությունում․ 2 նախարար, ուժային կառույցների ղեկավարներ ու ՊԵԿ նախագահն ազատման դիմում են ներկայացրել
Շիրակում կորոնավիրուսից մահվան 16-րդ դեպքն է գրանցվել․ Գյումրու ինֆեկցիոնում բուժվում է 75 հիվանդ
23.06.2020 | 16:18
Շիրակի մարզում կորոնավիրուսից մահվան նոր դեպք է արձանագրվել։ Այսպիսով, կորոնավիրուսից մահերի թիվը մարզում հասել է 16-ի։
Շիրակի մարզպետարանի հրապարակած տվյալների համաձայն՝ հունիսի 23-ի դրությամբ Գյումրու ինֆեկցիոն հիվանդանոցում կորոնավիրուսով 75 հիվանդ է բուժվում, 68-ը Շիրակի մարզի բնակիչ է։ Կորոնավիրուսից առողջացել և հիվանդանոցից մինչ օրս դուրս է գրվել Շիրակի մարզի 238 բնակիչ։ 33 հիվանդ տեղափոխվել և բուժում է ստանում մայրաքաղաքում։
Հունիսից մարզում կորոնավիրուսով հիվանդների կտրուկ աճ կա։ Ավելի վաղ Factor.am-ի հետ զրույցում մարզպետ Տիգրան Պետրոսյանն ասել էր, որ ստեղծված իրավիճակն այս փուլում մտահոգիչ է, առողջապահական համակարգն աշխատում է մեծ ծանրաբեռնվածությամբ։
«Հունիսի առաջին իսկ օրից հիվանդանոց ընդունվողների թիվը միանգամից սկսեց փոխվել։ Հիմա մեծ ալիքը, որը կա երկրում, վարակի տարածման մեծ ալիք կա նաև մարզում։ Այս փուլում, կոնտակտավորների և ասիմպտոմ ընթացքով մեծաթիվ հիվանդների առկայության և բժշկական սահմանափակ ռեսուրսով նրանց հետ մեկուսացման աշխատանքներ չիրականացնելու պայմաններում, ռիսկն ավելի մեծացավ։ Այսօր մարզի առողջապահական համակարգը շատ մեծ ծանրաբեռնվածությամբ է աշխատում»,- ասել էր Տիգրան Պետրոսյանը։
Շիրակի մարզում այս պահին տնային ինքնամեկուսացման ցուցում ունի 940 քաղաքացի, նրանցից 205-ի մոտ դրական ախտորոշում կա՝ հիվանդության անախտանիշ ընթացքով։ Նրանց հսկողությունն իրականացվում է առողջության առաջնային օղակի կողմից։
Մարտի 1-ից մինչ օրս Շիրակի մարզի բուժհաստատություններում և հիվանդությունների վերահսկման և կանխարգելման ազգային կենտրոնի մարզային կենտրոնում իրականացվել է 3․666 նմուշառում, մայիսի 12-ից հունիսի 22-ը ներառյալ Գյումրիում իրականացվել է 2․312 նմուշառման հետազոտություն։
