24.06.2026 | 22:56
Կամավոր հանձնվել է մեծ քանակի զենք-զինամթերք
Ստամբուլահայերը Ստամբուլի նահանգապետի հետ քննարկել են պատրիարքական աթոռի հիմնահարցը
Քաղաքականություն
23.05.2017 | 11:44
«Հայ ձայն»-ի Ստամբուլի աղբյուրը կարևոր տեղեկություններ է փոխանցել Ստամբուլի նահանգապետ Վասիփ Շահինի՝ մեր հայրենակիցների հետ տեղի ունեցած հանդիպման մասին: Ստամբուլահայ ազգային գործիչներ Խոսրով Քյոլեդավիթօղլուն և Կարո Գաբրիելյանը օրերս այցելել են Ստամբուլի նահանգապետին: Հանդիպման ընթացքում քննարկման նյութ է դարձել ստամբուլահայ համայնքին հուզող պատրիարքական աթոռի հիմնահարցը: Մեր աղբյուրը փոխանցեց նաև, որ երկու ազգային գործիչները մանրամասն տվյալներ են փոխանցել անցած հոկտեմբերին պատրիարքության կրոնական ժողովի արդյունքների, ինչպես նաև մինչև տեղապահի ընտրությունը տեղի ունեցած գլխավոր զարգացումների մասին:
Հիշեցնենք, որ մարտի 15-ին Ստամբուլում տեղի էր ունեցել Պոլսո Հայոց պատրիարքի տեղապահի ընտրությունը, ուր հաղթանակ էր տարել Գարեգին Բեկչյանը։ Սակայն ընտրություններում պարտված Արամ արքեպիսկոպոս Աթեշյանը ընտրություններից անմիջապես հետո հայտարարել էր, որ չի հեռանա տեղապահի պաշտոնից, քանի որ Ստամբուլի նահանգապետարանից գրություն էր ստացվել, ուր նշված էր, որ իրավաբանորեն անհնար է համարվում պատրիարքական ընտրությունների գործընթացի մեկնարկը:
Նշենք, որ կոմայի մեջ է գտնվող Պոլսո պատրիարք Մեսրոպ Մութաֆյանի փոխարեն այդ լիազորությունները կատարում էր Արամ արքեպիսկոպոս Աթեշյանը, որն ընտրվել էր ոչ թե հայ համայնքի, այլ պետության կողմից։
