Եթե Հայաստան-ԵՄ համաձայնագիրը չստորագրվի Հայաստանի մեղքով, դա խայտառակություն կլինի ողջ աշխարհի առջև. Կարապետ Ռուբինյան

Հայաստան-Եվրամիություն նոր համաձայնագիրը, որն ակնկալվում է՝ կստորագրվի վաղը Բրյուսելում կայանալիք գագաթնաժողովի շրջանակում, այնքան էլ հեղափոխական նշանակություն չի ունենա: Factor.am-ի հետ զրույցում նման կարծիք հայտնեց Ազգային ժողովի նախկին փոխնախագահ Կարապետ Ռուբինյանը:

«Խոսք չկա ո՛չ ասոցացման մասին, ո՛չ ազատ առևտրի գոտու մասին, բայց պետք է նշեմ, որ բավականաչափ կարևոր դրույթներ, այնուամենայնիվ, պահպանվել են նախորդ համաձայնագրից: Խոսքը վերաբերում է ժողովրդավարացմանը, մարդու իրավունքների պաշտպանությանը, կոռուպցիայի դեմ պայքարին և որոշ տնտեսական խնդիրներին»,- ընդգծեց Կարապետ Ռուբինյանը:

Ըստ նրա՝ համաձայնագրի ստորագրման հարցում խոչընդոտները կարող են լինել զուտ տեխնիկական, սակայն Եվրամիությանը կհաջողվի հաղթահարել դրանք: «Մեր հասարակության մեջ անհանգստություն կա՝ նախորդ համաձայնագրի տապալման փորձից, որ արդյոք Ռուսաստանը նույն մոտեցումը ցույց չի տա՝ վերջին պահին խափանելով համաձայնագրի ստորագրումը»,- շարունակեց նախկին պաշտոնյան:

Ինչ վերաբերում է Ռուսաստանի կողմից հնարավոր խոչընդոտների ստեղծմանը, ապա մեր զրուցակցի համոզմամբ՝ այս անգամ այդպիսի վտանգ չկա. «Ըստ Ռուսաստանի՝ որևէ կերպ վտանգված չէ Հայաստանի մասնակցությունը ԵՏՄ տխրահռչակ ակումբում: Բացի այդ, ժամանակներն էլ փոխվել են, Ռուսաստանի նկատմամբ պատժամիջոցների արդյունքում այդքան էլ ուժ չունի վերջինիս որդեգրած նեոգաղութատիրական քաղաքականությունը»:

Factor.am-ի հարցին՝ եթե այնուամենայնիվ համաձայնագրի ստորագրումը տեղի չունենա, ապա դա ի՞նչ հետևանք կունենա, Կարապետ Ռուբինյանը պատասխանեց. « Եթե դա արվի Հայաստանի մեղքով, կլինի հերթական անգամ խայտառակություն ողջ աշխարհի առջև: Մենք ցույց կտանք, որ լուրջ պետություն չենք և չենք կարող ինքնուրույն քաղաքականություն վարել»:

Հարցազրույցն ամբողջությամբ՝ տեսանյութում:

Շողիկ Գալստյան