Ռոբասերժական դատական համակարգի «դիակներից» պետք է ազատվել. Արմեն Խաչատրյան. ՏԵՍԱՆՅՈՒԹ

Ռոբերտ Քոչարյանի գործի վերաբերյալ Վճռաբեկ դատարանի՝ բողոքարկման ոչ ենթակա որոշումներին հակասող որոշում է կայացվել: Factor TV-ի հետ զրույցում նման կարծիք հայտնեց Հայ ազգային կոնգրեսի իրավական հարցերի հանձնաժողովի ներկայացուցիչ Արմեն Խաչատրյանը՝ անդրադառնալով Վերաքննիչ դատարանի այն որոշմանը, որով ՀՀ երկրորդ նախագահ, Մարտի 1-ի գործով ամբաստանյալ Ռոբերտ Քոչարյանի խափանման միջոց կալանքը փոխարինվում է գրավով:

«Այդպիսի որոշում կարող էր կայացվել, եթե ի հայտ էին եկել նոր հանգամանքներ, որոնք կարող էին դատարանին հնարավորություն տալ շրջանցել Վճռաբեկ դատարանի՝ արդեն իսկ հայտնած դիրքորոշումը»,- ասաց Արմեն Խաչատրյանը:

Արմեն Խաչատրյանը չի բացառում, որ դատավորը քաղաքական ճնշումների է ենթարկվել և չի առաջնորդվել արդարադատությամբ: «Այս որոշումը կայացվել է արդարադատության բուն էության խախտմամբ»,- ասաց նա և ընդգծեց՝ Վճռաբեկ դատարանը նոր որոշումը պետք է կայացնի արդեն իսկ կայացրած որոշումների համատեքստում:

Վերաքննիչ քրեական դատարանի դատավոր Արսեն Նիկողոսյանը Քոչարյանի խափանման միջոցը փոխելու միջնորդությունը քննելու ժամանակ բավականին սուր հարցադրումներ հնչեցրեց և ինչ-որ առումով Քոչարյանին անհարմար վիճակներում դրեց: Արմեն Խաչատրյանից հետաքրքրվեցինք՝ արդյո՞ք սպասելի էր նման վճիռ:

«Դա դատավորների հնարքներից է, երբ խիստ են պահում այն կողմի հանդեպ, ում օգտին պետք է որոշում կայացնեն: Շատ դատավորների մոտ կիրառվող պրակտիկա է»,- նկատեց Խաչատրյանը:

Արմեն Խաչատրյանն այստեղ տեսնում է նաև իշխանությունների թերացումը, քանի որ խոստացված բարեփոխումները չեն իրականացրել․ «Օրվա իշխանություններին փոխանցվել է մի դատական համակարգ, որը մեռած է և թաղված չէ: Քանի դեռ այդ «դիակներից» չի ազատվել դատական համակարգը, ապա ինքնամաքրում չի լինելու: Բոլոր դատավորները, բացառությամբ որոշ դեպքերի, նշանակված են Ռոբերտ Քոչարյանի կամ Սերժ Սարգսյանի կողմից: Այսօր մենք գործ ունենք ռոբասերժական դատական համակարգի հետ»:

Մանրամասները՝ տեսանյութում:

Նարեկ Կիրակոսյան