02.02.2026 | 12:22
Թրամփը Թեհրանի հետ գործարքի հույս ունի` չնայած «տարածաշրջանային պատերազմի» մասին Խամենեիի նախազգուշացումներին
Հատուկ ուշադրություն դարձրեք սրան, տպավորություն է, որ հիմնադրամն ինքն է որոշում՝ չունենալով պատվերներ. վարչապետի հանձնարարականը
23.11.2017 | 12:09
ՀՀ Կառավարության այսօրվա նիստում վարչապետ Կարեն Կարապետյանի հանձնարարականներից մեկը վերաբերում էր իրավական ակտերի նախագծերի կարգավորման ազդեցության գնահատմանը:
«2016 թվականի մարտ ամսին Կառավարության կողմից հիմնադրվել է «Օրենսդրության կարգավորման ազգային կենտրոն» հիմնադրամը, որն իրականացնում է համապատասխան նախագծերի կարգավորման բնագավառների վրա ազդեցության գնահատումը, մասնավորապես՝ անդրադառնալով հիմնավորվածությանը, այլընտրանքային տարբերակների սահմանման, նախագծի ընդունման ծախսերի և օգուտների հաշվառման հարցերին, արդյունքում տրամադրելով նախագիծը մշակող մարմնին համապատասխան առաջարկություններ»,- նշեց Կարապետյանը:
Ըստ նրա՝ իրականացված ուսումնասիրությունների արդյունքում արձանագրվել են դեպքեր, երբ առանց հստակ պատճառաբանություններ ներկայացնելու հիմնադրամի կողմից տրված առաջարկությունները չեն ընդունվել: Վարչապետը, հաշվի առնելով վերոնշյալը, հանձնարարեց հանրապետական գործադիր մարմինների ղեկավարներին առաջինը՝ գործնականում ապահովել իրավական ակտերի նախագծերի վերաբերյալ կարգավորման ազդեցության արդjունքում ներկայացված առաջարկությունների լիարժեք ուսումնասիրումը և վերլուծումը, իսկ դրանք մերժելու դեպքում՝ ներկայացնել հստակ հիմնավորումներ:
Բացի այդ, վարչապետը հանձնարարեց մեկամսյա ժամկետում ամփոփել և կառավարության աշխատակազմ ներկայացնել «Օրենսդրության կարգավորման ազգային կենտրոն» հիմնադրամի 2018 թվականի գործողությունների շրջանակում կարգավորման ազդեցության ենթակա իրավական ակտերի նախագծերի վերաբերյալ տեղեկատվություն՝ հաշվի առնելով կառավարության ծրագրով հաստատված միջոոցառումները և գերակա խնդիրները:
«Հատուկ ուշադրություն դարձրեք սրան, ինձ մոտ տպավորություն է, որ մեկ-մեկ այս հիմնադրամն ինքն է որոշում՝ չունենալով պատվերներ, քանի որ պատվիրատուն մենք ենք ստեղծել ենք մի օղակ, որը պետք է բոլոր այդ ռիսկերը գնահատի, համապատասխան վերլուծություն տա և, ըստ դրա, մենք որոշենք ճիշտ ուղղությամբ ենք գնո՞ւմ, թե՞ չէ»,- եզրափակեց Կառավարության ղեկավարը:
