Քաղաքականություն
18.06.2020 | 21:09
Ազգային ժողովն այսօր առաջին ընթերցմամբ ընդունեց ցեղասպանության ուղղակի և հրապարակային հրահրումը քրեականացնող օրենքի նախագիծը։
ՀՀ քրեական օրենսգրքում լրացումներ կատարելու մասին օրենքի նախագիծն ստացավ 100 կողմ ձայն: Նախագծով մասնավորապես, առաջարկվում է, որ ցեղասպանության ուղղակի և հրապարակային հրահրումը պետք է պատժվի ազատազրկմամբ` ութից տասը տարի ժամկետով:
Նույն արարքի համար, որը կատարվել է զանգվածային լրատվության միջոցներով, համակարգչային համակարգի միջոցով, մի խումբ անձանց կողմից նախնական համաձայնությամբ առաջարկվում է սահմանել ազատազրկում տասից տասնչորս տարի ժամկետով: Իսկ, եթե վերը նշված արաքները կատարվել են անձի կողմից իր պաշտոնեական դիրքն օգտագործելով կամ կազմակերպված խմբի կողմից առաջարկվել է սահմանել ազատազրում՝ տասնչորսից քսան տարի ժամկետով, կամ ցմահ ազատազրկում:
Նախագիծը հեղինակվել է «Իմ քայլը» խմբակցության պատգամավորներ Վլադիմիր Վարդանյանի, Արարատ Միրզոյանի, Հովհաննես Հովհաննիսյանի, Մխիթար Հայրապետյանի, Արուսյակ Ջուլհակյանի, Սարգիս Խանդանյանի, Արսեն Ջուլֆալակյանի, Թագուհի Ղազարյանի, Լիլիթ Մակունցի, Գոռ Գեւորգյանի կողմից։
