Ձերբակալվել է Բելառուսի նախագահի թեկնածու Վիկտոր Բաբարիկոն

Բելառուսի նախագահի թեկնածու, «Բելգազպրոմբանկ»-ի նախկին ղեկավար Վիկտոր Բաբարիկոն ձերբակալվել է։ ՏԱՍՍ-ի փոխանցմամբ՝ այս մասին «Բելառուս 1» հեռուստաալիքի եթերում հայտնել է Բելառուսի Պետական վերահսկողական կոմիտեի ղեկավար Իվան Տերտելը։

«Բաբարիկոն ձերբակալվել է այն բանի համար, որ հանդիսացել է հակաիրավական գործունեության անմիջական կազմակերպիչը, փորձել է ազդել վկաների վրա, թաքցնել ավելի լավ իրագործված հանցագործությունների հետքերը և օրերս փորձել է խոշոր գումար դուրս բերել իր վերահսկողության հաշիվներից»,- ասել է Տերտելը։

Reform.by-ի փոխանցմամբ էլ՝ այսօր առավոտյան Վիկտոր Բաբարիկոն և նրա որդին՝ Էդուարդ Բաբարիկոն, որը նաև հոր շտաբի ղեկավարն է, տարվել են ֆինանսական հետաքննությունների դեպարտամենտ՝ «Բելգազպրոմբանկ»-ի գործի շրջանակում քննչական գործողություններ իրականացնելու համար։ Փաստաբաններին թույլ չեն տվել այցելել նրանց, հայր ու որդի Բաբարիկոները ցուցմունք են տվել առանց պաշտպանների։

Նրանց բնակության վայրերում խուզարկություններ են անցկացվել, միաժամանակ, նախօրեին արգելանք է դրվել Վիկտոր Բաբարիկոյի ընտրական հիմնադրամի հատուկ հաշվեհամարի վրա։

Հիշեցնենք, որ հունիսի 11-ին «Բելգազպրոմբանկ»-ի գլխամասային գրասենյակում խուզարկություն է անցկացվել։ Երկու քրեական գործ է հարուցվել «Բելգազպրոմբանկ»-ի նախկին և ներկա աշխատակիցների նկատմամբ։ Ընդհանուր առմամբ, 15 մարդ է ձերբակալվել, խոշոր գումարներ և բանկի կորպորատիվ հավաքածուից կտավներ են առգրավվել։

Հունիսի 12-ին էլ Պետական վերահսկողական կոմիտեի ղեկավարը հայտարարել է, որ բանկի բազայի վրա կազմակերպված հանցավոր խումբ է ստեղծվել, որը դրամական միջոցներ է արտահանել երկրից, իսկ 20 տարի բանկը ղեկավարած Բաբարիկոն, իբր, այս ամենի մասնակիցն է եղել։