21.05.2026 | 21:03
Անդրանիկ Թևանյանի նկատմամբ գործ է հարուցվել լրտեսության և 622 հազարի դիմաց գաղտնի նյութեր տալու կասկածանքով
Իրավունքի վրա խարսխված եվրոպական մոտեցում ցուցաբերել ԼՂ հակամարտության կարգավորման հարցում. Րաֆֆի Հովհաննիսյանի կոչը՝ ԵԺԿ տեսակոնֆերանսին
Քաղաքականություն
18.06.2020 | 10:21
Հունիսի 17-ին Հայաստանի արտաքին գործերի առաջին նախարար և «Ժառանգություն» կուսակցության համահիմնադիր Րաֆֆի Կ. Հովհաննիսյանը տեսակապի միջոցով մասնակցել է Եվրոպական ժողովրդական կուսակցության Արևելյան գործընկերության առաջնորդների 7-րդ հանդիպմանը:
«ԵԺԿ ղեկավար Դոնալդ Տուսկի նախագահությամբ` ժողովում ընդգրկված էին Եվրամիության, ինչպես նաեւ եվրոպական գործընկեր երկրների քույր կուսակցությունների առաջնորդներ, այդ թվում` Եվրահանձնաժողովի նախագահ Ուրսուլա ֆոն դեր Լայենը, Կիպրոսի նախագահ Նիկոս Անաստասիադիսը, Գերմանիայի կանցլեր Անգելա Մերկելը, Լատվիայի եւ Խորվաթիայի վարչապետները եւ Արեւելյան գործընկերության հրավիրյալներ Բելառուսից, Վրաստանից, Մոլդովայից եւ Ուկրաինայից: Հայաստանի Հանրապետական կուսակցությունը ներկայացնում էր նրա նախագահ Սերժ Սարգսյանը:
Հանդիպմանը «Ժառանգությունը» ներկայացնող Րաֆֆի Հովհաննիսյանը հանդես եկավ ելույթով` անդրադառնալով ԵՄ-ի եւ նրա արեւելյան գործընկերների միջեւ անվտանգության եւ արդյունավետ կառավարման հարթություններում համագործակցության ամրապնդմանը, Հայաստանի ներքաղաքական իրավիճակին, տարածաշրջանային եւ աշխարհաքաղաքական մարտահրավերներին:
Առկա լարված իրավիճակի հենքին Հովհաննիսյանը կոչ արեց ավելի ողջամիտ, անաչառ եւ իրավունքի վրա խարսխված եվրոպական մոտեցում ցուցաբերել Լեռնային Ղարաբաղի (Արցախի) հակամարտության կարգավորման նկատմամբ եւ ընդգծեց խնդրի խաղաղ ու արդարացի լուծման անհրաժեշտությունը, որը հիմնված կլինի Արցախի ինքնորոշման, ինքնիշխանության, տարածքային ամբողջականության եւ միջազգային ճանաչման հայեցակարգի վրա»,- ասված է հաղորդագրությունում:
Հիշեցնենք, որ տեսակոնֆերանսին ելույթով հանդես էր եկել նաև ՀՀ 3-րդ նախագահ Սերժ Սարգսյանը, խոսել ինչպես կորոնավիրուսի համավարակի պայմաններում երկրում առողջապահական, սոցիալ-տնտեսական իրավիճակի, այնպես էլ, իր իսկ խոսքով ասած, պոպուլիզմի քաղաքական վիրուսով ախտահարված Հայաստանի իշխանությունների ապաշնորհ կառավարման արդյունքում երկրում ստեղծված ներքաղաքական վիճակի մասին:
Ավելի ուշ ԵԺԿ նախագահ Դոնալդ Տուսկը թվիեթերյան իր միկրոբլոգում գրառումներ էր կատարել Հայաստանի ներքաղաքական զարգացումների վերաբերյալ:
«Եվրոպական ժողովրդական կուսակցությունը մտահոգված է Հայաստանում ժողովրդավարական հետընթացի բազմաթիվ օրինակներով և Հայաստանի իշխանություններին կոչ է անում ձեռնպահ մնալ ընդդիմության նկատմամբ ճնշումներից»,- գրել էր Տուսկը:
