01.07.2026 | 08:52
ԱԱ-2026. Մեքսիկան 1/8 եզրափակիչում է. ՏԵՍԱՆՅՈՒԹ
Շիրակի մարզում կորոնավիրուսից մահվան 3 նոր դեպք է գրանցվել․ Գյումրու ինֆեկցիոնում բուժվում է 63 հիվանդ
17.06.2020 | 15:30
Շիրակի մարզում արձանագրվել է կորոնավիրուսից մահվան 14 դեպք։ Երկու օրվա ընթացքում մահերի թիվն ավելացել է 3-ով. երկուսը տղամարդ են, մեկը՝ կին։ Հիվանդներից մեկը մահացել է Գյումրիում, մյուս երկուսը՝ Երևանում։ Նրանցից մեկը միանգամից դիմել է Երևանի «Արմենիա» բժշկական կենտրոն, որտեղ էլ մահացել է, մյուս հիվանդը Գյումրիից է Երևան տեղափոխվել։ Այս մասին Factor.am-ին փոխանցեցին Շիրակի մարզպետարանի տեղեկատվության ու հասարակայնության հետ կապերի բաժնից։
Նշենք, որ մահվան նախորդ դեպքը ևս գրանցվել էր Գյումրիի ինֆեկցիոն հիվանդանոցում։
Շիրակի մարզպետարանի հրապարակած տվյալների համաձայն՝ հունիսի 17-ի ժամը 11։30-ի դրությամբ, Գյումրու ինֆեկցիոն հիվանդանոցում կորոնավիրուսով 63 հիվանդ է բուժվում, 52-ը Շիրակի մարզի բնակիչ է։ Կորոնավիրուսից առողջացել և հիվանդանոցից մինչ օրս դուրս է գրվել մարզի 224 բնակիչ։ 32 հիվանդ տեղափոխվել և բուժում է ստանում մայրաքաղաքում։
Շիրակում վերջին շրջանում շարունակում է աճել կորոնավիրուսի հիվանդների թիվը։ Վարակման դեպքեր են գրանցվել ոստիկանների ու բուժաշխատողների շրջանում։ Գյումրիում գործող «Լենտեքս» ու «Սվետտեքս» կարի արտադրամասերի աշխատակիցների շրջանում ևս ավելի վաղ կորոնավիրուսի դեպքեր էին հաստատվել․ յուրաքանչյուր ընկերությունում 20-ից ավելի վարակակիր էր հայտնաբերվել, որոնց թիվն ավելանում է։
Ավելացել է նաև տնային ինքնամեկուսացում ունեցող ու անախտանիշ հիվանդների թիվը։ Շիրակի մարզում այս պահին տնային ինքնամեկուսացման ցուցում ունի 1123 քաղաքացի, նրանցից 201-ի մոտ դրական ախտորոշում կա՝ հիվանդության անախտանիշ ընթացքով։ Նրանց հսկողությունն իրականացվում է առողջության առաջնային օղակի կողմից։
Մարտի 1-ից մինչ օրս Շիրակի մարզի բուժհաստատություններում և հիվանդությունների վերահսկման և կանխարգելման ազգային կենտրոնի մարզային կենտրոնում իրականացվել է 3.229 նմուշառում, մայիսի 12-ից հունիսի 16-ը ներառյալ Գյումրիում իրականացվել է 1.875 նմուշառման հետազոտություն։
Էմմա Չոբանյան
