Քաղաքականություն
22.11.2017 | 15:16Ցավոք սրտի, որևէ ակնկալիք չկա արցախյան հիմնահախնդրի լուծման հետ կապված. այսօր հրավիրած ասուլիսի ժամանակ նման կարծիք հայտնեց «Մոդուս վիվենդի» կենտրոնի ղեկավար Արա Պապյանը՝ անդրադառնալով ղարաբաղյան հակամարտության շուրջ վերջին քննարկումներին եւ բարձրաստիճան հանդիպումներին:
«Լավրովի այցը Ռուսաստանի համար անհրաժեշտ այց էր, հատկապես՝ սա հնարավորություն էր տալիս քննարկելու Ադրբեջանի՝ ԵՏՄ-ին անդամակցելու հարցը, իսկ Հայաստանում էլ քննարկելու մի շարք հարակից հարցեր, բայց անգամ Լավրովն ինքը նշեց, որ առանձնապես մեծ հույսեր չկան»,- նշեց Արա Պապյանը:
Ապա անդրադառնալով ԼՂ հակամարտության կարգավորման համար զիջումներ անելու շուրջ շրջանառվող խոսակցություններին՝քաղաքագետը նկատեց. «Ադրբեջանը որևէ քայլ չի անում իր իսկ ստանձնած պարտավորությունները կատարելու հարցում, չնայած որ Հայաստանի իշխանությունները բազմաթիվ անգամ հայտնել են զիջումների գնալու իրենց պատրաստակամությունը»:
Խոսելով հարևան երկրների կողմից Հայաստանը մեկուսացնելու նպատակով իրականացվող ծրագրերի, այդ թվում եւ՝ վերջերս գործարկված Բաքու Թբիլիսի-Կարս երկաթգծի մասին, բանախոսը նկատեց. «Հայաստանը մեկուսացնելու քաղաքականությունը շարունակվում է և շարունակվելու է: Իսկ մենքի՞նչ պիտի անենք. հայթայթված գումարները պետք է ուղղենք ավտոմոբիլային լավ ճանապարհ կառուցելուն, այսինքն՝ երկաթգծին պիտի հակադրենք լավ ավտոմոբիլային ճանապարհը»:
Մանրամասները՝ տեսանյութում:
